8 снежня, Мінск /Уладзімір Мацвееў - БЕЛТА/. Старшыня расійскай дзяржаўнай карпарацыі "Банк развіцця і знешнеэканамічнай дзейнасці" (Знешэканамбанк) Сяргей Гаркоў заяўляе аб наяўнасці цікавых прапаноў па павелічэнні сумеснага экспарту Беларусі і Расіі. Аб гэтым ён заявіў сёння ў Мінску на сустрэчы з Прэзідэнтам Беларусі Аляксандрам Лукашэнкам, перадае карэспандэнт БЕЛТА.
"У нас ужо фактычна дзевяць гадоў супрацоўніцтва. Больш за мільярд долараў агульных інвестыцый. Ёсць буйныя праекты, як атамная станцыя, - сказаў старшыня Знешэканамбанка. - У нас ёсць цікавыя прапановы па павелічэнні сумеснага экспарту Беларусі і Расіі. Мы дамовіліся з урадам падпісаць аб гэтым сёння пагадненне. Ёсць шмат магчымасцей для павелічэння супрацоўніцтва".
Сяргей Гаркоў таксама падзякаваў беларускаму боку за падтрымку ў рабоце банка. "Мы заўсёды знаходзім агульную мову", - адзначыў ён.
Як паведамлялася, урад Беларусі і расійская дзяржаўная карпарацыя "Банк развіцця і знешнеэканамічнай дзейнасці" (Знешэканамбанк) плануюць падпісаць мемарандум аб намерах па стварэнні інтэграцыйнай платформы развіцця. Гэта прадугледжана пастановай Савета Міністраў ад 5 снежня 2016 года нумар 994, афіцыйна апублікаванай на Нацыянальным прававым інтэрнэт-партале.
Дакумент будзе заключаны ў мэтах садзейнічання ўстойліваму эканамічнаму развіццю нацыянальных эканомік і ўмацаванню ўзаемнага тавараабароту паміж Беларуссю і Расіяй. Чакаецца, што мемарандум таксама падпішуць акцыянернае таварыства "Расійскі экспартны цэнтр", ААТ "Банк развіцця Рэспублікі Беларусь" і ААТ "Белзнешэканамбанк". На падпісанне дакумента з беларускага боку ўпаўнаважаны першы намеснік прэм'ер-міністра Васіль Мацюшэўскі.-0-