22 лютага, Мінск /Кар. БЕЛТА/. Прадстаўнікі бізнес-саюзаў і Міністэрства эканомікі расказалі сёння журналістам аб першых выніках прыняцця дэкрэта нумар 7 "Аб развіцці прадпрымальніцтва", асноўныя палажэнні якога ўступяць у сілу 26 лютага, перадае карэспандэнт БЕЛТА.
Паводле ацэнкі старшыні Беларускага саюза прадпрымальнікаў Аляксандра Калініна, цяпер у краіне назіраецца павелічэнне дзелавой актыўнасці. Пры гэтым ён падкрэсліў, што дэкрэт нумар 7 яшчэ толькі ўступае ў сілу праз некалькі дзён, і трэба яшчэ рэалізаваць цэлы комплекс мерапрыемстваў, каб магчымасці дакумента былі выкарыстаны ў поўнай меры. Аляксандр Калінін таксама лічыць, што ўзмацніць эфект ад прыняцця дэкрэта нумар 7 магла б падатковая аптымізацыя, якая садзейнічала б павышэнню падатковай канкурэнтаздольнасці беларускага бізнесу.
Старшыня прэзідыума Рэспубліканскай канфедэрацыі прадпрымальніцтва, старшыня Мінскага сталічнага саюза прадпрымальнікаў і работадаўцаў Уладзімір Карагін расказаў, што бізнес ускладае вялікія надзеі на рэалізацыю дэкрэта. Паводле яго слоў, ужо цяпер відаць, што пакет дакументаў па лібералізацыі ўмоў вядзення бізнесу працуе - расце колькасць самазанятых, добры імпульс нададзены развіццю аграэкатурызму і рамесніцтва.
Намеснік міністра эканомікі Дзмітрый Матусевіч у сваю чаргу лічыць, што яшчэ рана чакаць гучных вынікаў і канкрэтных лічбаў, аб гэтым можна будзе гаварыць праз некаторы час пасля ўступлення дакумента ў сілу. Аднак ужо цяпер прыпынены праверкі, змяніўся механізм кантрольнай дзейнасці. Створаны ўмовы для павелічэння колькасці занятых у эканоміцы, новых рабочых месцаў, што адпавядае палажэнням дэкрэта нумар 1.
Паводле слоў намесніка міністра, работа па паляпшэнні ўмоў вядзення бізнесу з прыняццем дэкрэта не спыняецца. Так, грузавікі стандарту Еўра-6 вызваляюцца ад выплаты ўтыльзбору ў Беларусі ў 2018 годзе. Такая праблема ўзнімалася на сустрэчы Прэзідэнта з прадстаўнікамі дзелавых колаў у снежні 2017 года, і цяпер яна вырашана.-0-
