23 лютага, Мінск /Кар. БЕЛТА/. Пасяўная ў 2017 годзе пройдзе арганізавана і ў лепшыя агратэхнічныя тэрміны, заявіў міністр сельскай гаспадаркі і харчавання Беларусі Леанід Заяц у інтэрв'ю "Сельской газете", паведамляе БЕЛТА.
"Структура пасяўных плошчаў адпрацавана, пад яе падрыхтавана насенне. Тэхніка яшчэ поўнасцю не адрамантавана, але ўзровень гатоўнасці для сённяшняга дня дастаткова высокі. Таму ў мяне не выклікае сумнення, што гэту пасяўную кампанію мы правядзём арганізавана і ў лепшыя агратэхнічныя тэрміны", - падкрэсліў міністр.
Леанід Заяц адзначыў, што адной з важнейшых задач цяпер з'яўляецца накапленне мінеральных угнаенняў. "Цяпер гаспадаркам трэба актыўней знаходзіць фінансы, аплачваць угнаенні і запасацца імі. Акрамя таго, да сяўбы трэба поўнасцю пачысціць фермы, вывезці ўсю арганіку на палі, каб кампенсаваць адсутную колькасць дарагіх тукаў", - растлумачыў ён.
Міністр таксама нагадаў, што да 1 сакавіка галіна павінна пагасіць таварны крэдыт на 80 тыс.т гаручага. "Пасля гэтага будзем звяртацца да кіраўніка дзяржавы з просьбай аб новым таварным крэдыце на такую ж колькасць гаручага для правядзення сяўбы. Паліва таксама будзе закупляцца за надбаўкі да рэалізаванай прадукцыі, за атрыманыя на спецрахункі грошы за малако, перапрацоўчыя прадпрыемствы выдзеляць авансы ў лік дзяржзаказу на прадукцыю раслінаводства. Аднак хачу яшчэ раз нагадаць: гаспадаркам не трэба жыць толькі чаканнямі дапамогі. Настаў час самім актыўна зарабляць грошы. Цэны на прадукцыю, асабліва малако, рапс, цукровыя буракі, даюць магчымасць мець нядрэнныя даходы. Вядома, пры высокіх надоях і ўраджаях", - канстатаваў ён.-0-
