26 мая, Казань /Кар. БЕЛТА/. Пакет пагадненняў падпісаны сёння па выніках пасяджэння Савета кіраўнікоў урадаў Садружнасці Незалежных Дзяржаў у Казані, перадае карэспандэнт БЕЛТА.
У парадак дня было ўключана шырокае кола пытанняў інтэграцыйнага ўзаемадзеяння краін СНД.
Кіраўнікі ўрадаў падпісалі шэраг пагадненняў: аб сумесным выкарыстанні эксперыментальнага комплексу на базе казахстанскага матэрыялазнаўчага такамака; аб збліжэнні падыходаў па нарматыўна-прававым і нарматыўна-тэхнічным рэгуляванні, ацэнцы адпаведнасці, стандартызацыі, акрэдытацыі і метралагічным забеспячэнні ў галіне выкарыстання атамнай энергіі ў мірных мэтах; аб супрацоўніцтве ў падрыхтоўцы, перападрыхтоўцы і павышэнні кваліфікацыі спецыялістаў у галіне геадэзіі, картаграфіі, кадастра і дыстанцыйнага зандзіравання Зямлі; аб супрацоўніцтве ў сферы процідзеяння вытворчасці і распаўсюджванню кантрафактнай прадукцыі.
Быў таксама падпісаны пратакол аб унясенні змяненняў у пагадненне аб супрацоўніцтве ў галіне прававой аховы і абароны інтэлектуальнай уласнасці і стварэнні Міждзяржаўнага савета па пытаннях прававой аховы і абароны інтэлектуальнай уласнасці ад 19 лістапада 2010 года.
Удзельнікі пасяджэння зацвердзілі план першачарговых мерапрыемстваў па рэалізацыі стратэгіі забеспячэння транспартнай бяспекі на тэрыторыях дзяржаў Садружнасці пры ажыццяўленні перавозак у міжнародных зносінах на перыяд 2017-2019 гадоў; комплекс мерапрыемстваў на 2017-2020 гады па рэалізацыі міждзяржаўнай праграмы інавацыйнага супрацоўніцтва дзяржаў СНД на перыяд да 2020 года; міждзяржаўную радыёнавігацыйную праграму дзяржаў Садружнасці на перыяд да 2020 года.
На пасяджэнні прынята рашэнне аб парадку вызначэння памеру ўзнагароджання членаў і старшыні камісіі экспертаў, кампенсуемых ім расходаў, забеспячэння аплаты ўзнагароджання і расходаў, прадугледжаных дадаткам 4 да Дагавора аб зоне свабоднага гандлю ад 18 кастрычніка 2011 года.
У адпаведнасці з рашэннем Савета кіраўнікоў дзяржаў СНД ад 16 верасня 2016 года аб Эканамічным Судзе Садружнасці члены Савета кіраўнікоў урадаў зацвердзілі парадак забеспячэння дзейнасці суддзяў, уключаных у рэестр суддзяў, а таксама вызначылі шэраг мерапрыемстваў, звязаных з рэарганізацыяй гэтага суда.
Былі ўдакладнены палажэнні аб аператары Міждзяржаўнай праграмы інавацыйнага супрацоўніцтва дзяржаў СНД на перыяд да 2020 года, аб бюро па каардынацыі барацьбы з арганізаванай злачыннасцю і іншымі небяспечнымі відамі злачынстваў на тэрыторыі дзяржаў Садружнасці.-0-
