Мабільная версія
ДЗЯРЖОРГАНЫ
Апошнія навіны
Усе навіны

Пакет дакументаў аб спрашчэнні ўмоў вядзення бізнесу ў Беларусі вынесены на грамадскае абмеркаванне

Эканоміка 12.04.2017 | 17:01

12 красавіка, Мінск /Кар. БЕЛТА/. Пакет нарматыўных прававых актаў аб спрашчэнні ўмоў вядзення бізнесу ў Беларусі вынесены на грамадскае абмеркаванне. Дакументы размешчаны сёння на Нацыянальным прававым інтэрнэт-партале, дзе з імі можа азнаёміцца любы жадаючы, паведамляе БЕЛТА.

Пакет уключае праекты дэкрэта і некалькіх указаў. Як растлумачыў журналістам намеснік кіраўніка Адміністрацыі Прэзідэнта Валерый Міцкевіч, асноўныя змяненні ў дэкрэце прадугледжваюць спрашчэнне працэдуры адкрыцця бізнесу і вядзення сваёй справы. Напрыклад, каб адкрыць кафэ, прадпрымальніку будзе дастаткова паведаміць аб гэтым мясцовым органам улады. Пры гэтым бізнесмен гарантуе, што будзе выконваць усе неабходныя патрабаванні. А іх пералік прапануецца мінімізаваць - такую задачу паставіў кіраўнік дзяржавы.

Валерый Міцкевіч расказаў, што ў прапануемых для грамадскага абмеркавання дакументах прадугледжана: "усе цяпер дзеючыя пажарныя, санітарныя правілы будуць адменены, а новыя зацверджаны ў мінімальным варыянце актам кіраўніка дзяржавы". Пералік будзе абмяжоўвацца асноўнымі абавязковымі для выканання патрабаваннямі. Усё астатняе застанецца ў выглядзе рэкамендацый.

Сярод дакументаў ёсць рэгулюючы кантрольна-наглядную дзейнасць. Ім прадугледжваецца істотнае змяншэнне колькасці праверак. У прыватнасці, планавыя наогул будуць адменены. "Застануцца толькі пазапланавыя і строга па вызначаных у дакуменце падставах", - сказаў Валерый Міцкевіч. Паводле яго слоў, гэта дасць магчымасць выключыць праверкі па надуманых прычынах.

Прапануецца таксама ўвесці ў Беларусі інстытут падатковых кансультантаў, своеасаблівых пасрэднікаў паміж бізнесам і падатковымі органамі. Гэта павінна пазбавіць бізнес ад неабходнасці ўнікаць ва ўсе тонкасці падаткаабкладання. Задача прадпрымальніка будзе ў тым, каб прадастаўляць падатковым кансультантам правільныя даныя. "Яны будуць несці адказнасць за паўнату выплаты падаткаў, за іх правільнасць і адказваць, калі што-небудзь не так", - адзначыў Валерый Міцкевіч.

Адначасова са спрашчэннем патрабаванняў, іх канкрэтызацыяй прапануецца ўзмацніць адказнасць уладальнікаў бізнесу за іх захаванне.

Грамадскае абмеркаванне дакументаў будзе праводзіцца на працягу месяца. Усе прапановы будуць разглядацца ў працэсе іх дапрацоўкі. Прэзідэнту будзе прадстаўлены абноўлены варыянт. Ад бізнесу і грамадзян чакаюць канкрэтных прапаноў па разняволенні дзелавой ініцыятывы.-0-

Версія для друку
Навіны рубрыкі Эканоміка
Топ-навіны
Надвор'e
Мінск
Баранавічы
Бабруйск
Барысаў
Брэст
Варшава
Вільнюс
Віцебск
Гомель
Гродна
Жлобін
Кіеў
Ліда
Мінск
Магілёў
Мозыр
Масква
Орша
Полацк
Рыга
Санкт-Пецярбург
Салігорск

Інфаграфіка

Гандаль у святочныя дні Магазінам Мінска з 15 снежня па 15 студзеня рэкамендавана працаваць без закрыцця на рамонт і санітарны дзень.