21 ліпеня, Мінск /Кар. БЕЛТА/. Новы завод "БелДжы" пачне серыйную вытворчасць аўтамабіляў у жніўні, паведаміў журналістам першы намеснік міністра прамысловасці Беларусі Генадзь Свідзерскі, перадае карэспандэнт БЕЛТА.
"У жніўні плануем эксплуатацыйныя выпрабаванні завода па вытворчасці легкавых аўтамабіляў. Па поўным тэхналагічным цыкле пройдуць 222 аўтамабілі, яны будуць вырабляцца ў бесперапынным рэжыме, - сказаў Генадзь Свідзерскі. - У жніўні пяройдзем да стадыі серыйнай вытворчасці і экспартных паставак аўтамабіляў".
Доследная партыя аўтамабіляў была сабрана па поўным тэхналагічным цыкле ў чэрвені. Генадзь Свідзерскі падкрэсліў, што абсталяванне паказала сябе эфектыўным і адпаведным патрабаванням тэхнічнага задання. Мадэльны рад арыентаваны на розныя цэнавыя сегменты.
Як паведамлялася, праектная магутнасць новага завода пад Барысавам на першым этапе складзе 60 тыс. машын у год. На ўжо існуючым заводзе наладжана вытворчасць красовера Geely Emgrand X7, седана Geely SC7 і хэтчбэка Geely LC Cross.-0-
