27 ліпеня, Мінск /Кар. БЕЛТА/. Нарматыўны капітал банкаў па стане на 1 ліпеня склаў Br81,7 трлн (недэнамінаваных рублёў) і павялічыўся ў параўнанні з 1 студзеня на Br3,2 трлн, або на 4,1 працэнта. Такія даныя прыводзяцца ў бюлетэні банкаўскай статыстыкі Нацыянальнага банка, паведамляе БЕЛТА.
Дастатковасць нарматыўнага капіталу ў цэлым па банкаўскім сектары на 1 ліпеня склала 17,2 працэнта (на 1 студзеня гэты паказчык быў на ўзроўні 18,7 працэнта) пры нарматыве не менш за 10 працэнтаў. Для параўнання: на 1 ліпеня 2015 года дастатковасць нарматыўнага капіталу складала 16,8 працэнта.
Сукупны зарэгістраваны статутны фонд па банкаўскім сектары з пачатку года павялічыўся на Br1,3 трлн да Br46,2 трлн на 1 ліпеня.
Актывы банкаў на 1 ліпеня склаліся ў суме Br641,7 трлн, з пачатку года яны павялічыліся на 1,8 працэнта. Доля актываў у замежнай валюце вырасла з 62,1 працэнта (на 1 студзеня) да 63,7 працэнта (на 1 ліпеня гэтага года). Удзельная вага патрабаванняў да эканомікі (суб'ектаў гаспадарання і фізічных асоб) у актывах банкаў на 1 ліпеня склала 68,1 працэнта (на 1 студзеня - 66 працэнтаў).
Па стане на 1 ліпеня банкаўскі сектар Беларусі ўключаў 30 банкаў і 2 нябанкаўскія крэдытна-фінансавыя арганізацыі, з якіх чатыры банкі знаходзяцца ў стадыі банкруцтва або ліквідацыі. У 21 банку прысутнічаў замежны капітал, пры гэтым у 16 банках доля ўдзелу замежных інвестараў у статутным фондзе перасягала 50 працэнтаў.-0-
