5 верасня, Мінск /Вера Сяргеева - БЕЛТА/. На будаўніцтва жылля з дзяржпадтрымкай у Беларусі банкі дадаткова накіруюць Br500 млн крэдытных рэсурсаў. Аб гэтым паведаміў журналістам намеснік прэм'ер-міністра Беларусі Анатоль Калінін сёння пасля адкрыцця 25-й міжнароднай спецыялізаванай выстаўкі "Будпрагрэс", перадае карэспандэнт БЕЛТА.
"У рамках указа нумар 240 ужо выдзелена Br135 млн. Гэтыя сродкі ў рабоце, будуецца жыллё. Дадаткова будуць прыцягнуты Br500 млн сродкаў банкаў на бягучы год і на наступны год, з гэтай сумы больш як 35 працэнтаў выкарыстуем для будаўніцтва жылля ў 2017 годзе, дзве трэці пяройдуць на 2018 год, - сказаў Анатоль Калінін. - У будучым, магчыма, выведзем усіх маючых патрэбу ў сістэму крэдытавання паводле ўказа нумар 240".
Віцэ-прэм'ер таксама адзначыў, што ўдзел у механізме крэдытавання паводле ўказа нумар 240 павінен быць запатрабаваным усімі банкамі. "У гэту сістэму павінны ўвайсці ўсе банкі. Будзе створана канкурэнтнае асяроддзе. Банкам выгадна працаваць у гарантаваным фінансавым механізме, пры якім дзяржава субсідзіруе частку рэсурсаў", - растлумачыў ён.
Анатоль Калінін адзначыў, што ўказ нумар 240 пакуль не мае высокай запатрабаванасці ў насельніцтва. "Стаіць задача аб правядзенні растлумачальнай работы сярод насельніцтва, каб чалавек разумеў, што пры звароце ў мясцовыя органы ўлады, затым у банк ён атрымае рэсурс, прадугледжаны ўказам нумар 240. Фінансавы інструмент для гэтага ёсць", - рэзюмаваў віцэ-прэм'ер.
Механізм прадастаўлення дзяржаўных субсідый распрацаваны з улікам максімальнага захавання прынцыпаў дзеючай сістэмы дзяржпадтрымкі жыллёвага будаўніцтва: сума дзяржаўнай падтрымкі будзе разлічвацца зыходзячы з колькасці членаў сям'і, нарміруемых памераў жылога памяшкання і гранічнага нарматыву кошту будаўніцтва; умовамі прадастаўлення такой дзяржпадтрымкі будуць чарговасць атрымання і аднясенне грамадзян да катэгорыі малазабяспечаных.
Згодна з указам нумар 240, памер субсідыі на выплату часткі працэнтаў для сем'яў з трыма непаўналетнімі дзецьмі будзе роўны стаўцы рэфінансавання плюс 2 працэнты, з чатырма і больш непаўналетнімі дзецьмі - стаўцы рэфінансавання плюс 3 працэнты, з трыма і больш дзецьмі да 23 гадоў, дзецям-сіротам і дзецям, якія засталіся без апекі бацькоў, - стаўцы рэфінансавання плюс 2 працэнты. Сем'ям з чатырма і больш дзецьмі асноўны доўг будзе пагашаны на 100 працэнтаў, з трыма сумесна пражываючымі дзецьмі ва ўзросце да 23 гадоў - на 95 працэнтаў, дзецям-сіротам - на 35 працэнтаў, маладым сем'ям пры нараджэнні аднаго і двух дзяцей - 10 працэнтаў і 20 працэнтаў адпаведна.-0-
