4 кастрычніка, Мінск /Кар. БЕЛТА/. Каля 5 тыс. трактароў і трактаракамплектаў розных мадыфікацый плануе паставіць Мінскі трактарны завод ва Украіну ў 2020 годзе. Аб гэтым БЕЛТА паведамілі на прадпрыемстве па выніках першага дня II Форуму рэгіёнаў Беларусі і Украіны ў Жытоміры.
Напярэдадні ў горадзе адкрылася выстаўка беларускай і ўкраінскай буйнагабарытнай тэхнікі. Сваю прадукцыю прапанавалі 15 беларускіх і 10 украінскіх вытворцаў. Экспазіцыя Мінскага трактарнага завода карыстаецца вялікай папулярнасцю. На выстаўцы прадстаўлена сем мадэлей трактароў BELARUS, таму кожны спажывец можа падабраць камплектацыю, якая падыходзіць менавіта яго патрэбнасцям.
На прадпрыемстве адзначылі, што ў бягучым годзе ўзрасла колькасць жадаючых набыць тэхніку палепшанай камплектацыі. Напрыклад, BELARUS 1523ВТ1 - мадэль больш высокай камфортнасці: ізатэрмічнае шкло, клімат-кантроль, павялічаны ўзровень гукаізаляцыі ў кабіне пілота, сядзенне, абсталяванае пнеўмападвескай, і так званае "трапічнае выкананне" (трактар можа працаваць пры тэмпературы да плюс 50).
ААТ "Мінскі трактарны завод" - адзін з буйнейшых вытворцаў сельскагаспадарчай тэхнікі ў свеце. У склад холдынга акрамя МТЗ уваходзіць 9 прадпрыемстваў, створана 26 зборачных вытворчасцей за мяжой. На вытворчасці працуюць больш як 17 тыс. чалавек, прадукцыя прадстаўлена на рынках больш як 60 дзяржаў.-0-
