28 лістапада, Мінск /Кар. БЕЛТА/. Пераўтварэнні ў беларускай IT-сферы зацікавяць замежны бізнес. Аб гэтым сёння заявіў старшыня Савета Рэспублікі Міхаіл Мясніковіч, адкрываючы пасяджэнне Парламенцкай асамблеі Цэнтральна-Еўрапейскай ініцыятывы (ЦЕІ) у Мінску, перадае карэспандэнт БЕЛТА.
Спікер адзначыў, што 2017 год стаў знакавым для IT-галіны ў Беларусі. Прэзідэнт паставіў задачу аб яе ператварэнні ў IT-краіну. Вядучыя айчынныя і замежныя профільныя спецыялісты і юрысты падрыхтавалі, "можна сказаць, рэвалюцыйны праект нарматыўнага прававога акта", - сказаў Міхаіл Мясніковіч.
Ён выказаў упэўненасць, што дакумент зацікавіць бізнесменаў і маючых дачыненне да інфармацыйных тэхналогій палітыкаў краін - удзельніц ЦЕІ.
У пасяджэнні Парламенцкай асамблеі Цэнтральна-Еўрапейскай ініцыятывы акрамя Беларусі ўдзельнічаюць 12 краін, у тым ліку Албанія, Балгарыя, Венгрыя, Румынія, Польшча, Аўстрыя, Славенія і Украіна. На мерапрыемства запрошаны дэпутаты Палаты прадстаўнікоў, вучоныя, прадстаўнікі рэальнага сектара эканомікі, уключаючы кіраўнікоў вядучых інавацыйных і высокатэхналагічных прадпрыемстваў. Агульная тэматыка пасяджэння Парламенцкай асамблеі ЦЕІ ў Мінску - лічбавыя тэхналогіі ва ўмовах забеспячэння геапалітычнай бяспекі.
На пасяджэнні будуць абмяркоўвацца пытанні развіцця лічбавай эканомікі ў аспекце інфармацыйнай бяспекі, лічбавых банкаўскіх тэхналогій, прыняцця заканадаўчых, арганізацыйных і іншых мер па падтрымцы стварэння IT-прадуктаў, тэхналогій беспілотнага ваджэння, штучнага інтэлекту, біятэхналогій.
Беларусь упершыню старшынствуе ў ЦЕІ ў 2017 годзе. Дэвіз яе старшынства "Пашырэнне сумяшчальнасці ў Вялікай Еўропе". Гэта рэгіянальнае аб'яднанне ўключае 18 краін. Галоўная задача ЦЕІ - садзейнічанне ўмацаванню гібкага і прагматычнага еўрапейскага рэгіянальнага супрацоўніцтва ў мэтах прадухілення ўтварэння новых раздзяляльных ліній у Еўропе.-0-