28 сакавіка, Мінск /Кар. БЕЛТА/. Мінфін не выключае ў сярэднетэрміновай перспектыве зніжэння ставак падаходнага падатку і падатку на прыбытак. Аб гэтым сёння на міжнароднай навукова-практычнай канферэнцыі "Фіскальная палітыка ў мэтах устойлівага эканамічнага развіцця" заявіў намеснік міністра фінансаў Дзмітрый Кійко, перадае карэспандэнт БЕЛТА.
Згодна з прадстаўленай інфармацыяй, да асноўных напрамкаў удасканалення падатковай сістэмы ў сярэднетэрміновай перспектыве з 2019 па 2021 год адносяцца зніжэнне ставак прамых падаткаў (падаходны падатак і падатак на прыбытак), павышэнне ролі ўскосных падаткаў (ПДВ і акцызы).
Акрамя таго, магчымы перагляд дзеючага пакета падатковых ільгот і парадку іх прадастаўлення, рэформа маёмасных падаткаў, вырашэнне пытання аб уключэнні ў падатковую сістэму ўзносаў у ФСАН. Прадугледжана таксама выпрацоўка механізмаў абароны сацыяльна слабаабароненых слаёў насельніцтва.
"Да сістэмных задач адносіцца рэалізацыя эфектыўных інструментаў, якія стануць асновай для фарміравання неабходнага аб'ёму рэсурснай базы без урону для канкурэнтаздольнасці эканомікі. Гэта тыя задачы, якія нам трэба будзе вырашыць у сярэднетэрміновай перспектыве пасля бягучай карэкціроўкі Падатковага кодэкса", - сказаў намеснік міністра.
У сітуацыі, якая складваецца, на думку Дзмітрыя Кійко, апраўданым бачыцца зніжэнне ставак прамых падаткаў пры адначасовым узмацненні ролі ўскосных. Гэта, з аднаго боку, будзе стымуляваць інвестыцыйную прывабнасць і забяспечыць падтрымку малазабяспечаных слаёў насельніцтва, а з іншага - павысіць стабільнасць даходаў у бюджэт. "Такая тэндэнцыя поўнасцю супадае з еўрапейскай падатковай палітыкай. Апошнія дзесяць гадоў у Еўропе растуць стаўкі ПДВ і зніжаюцца стаўкі карпаратыўных падаткаў. Калі браць радыкальныя варыянты, мы можам наогул разглядаць варыянт, пры якім у нас стаўка падатку на прыбытак і падаходнага падатку будзе ўстаноўлена на ўзроўні 10 працэнтаў. Але, зразумела, будзе ўзмоцнена роля ПДВ. Мы можам тады гаварыць аб адзінай стаўцы ПДВ на ўзроўні 20-21 працэнта. Але гэта радыкальны варыянт, ад якога можна адштурхоўвацца і абмяркоўваць. Ёсць шмат падварыянтаў і ў адзін, і ў іншы бок. Але, у прынцыпе, такая сістэма магла б збалансавацца", - лічыць намеснік міністра.
У цэлым Дзмітрый Кійко падкрэсліў, што неабходна весці размову аб падатковай рэформе ў Беларусі, да чаго падштурхоўвае шэраг акалічнасцей. Ён, у прыватнасці, згадаў змяненне за апошнія 8 гадоў структуры даходаў бюджэту, а менавіта звужэнне падатковай базы і паступленняў па асноўных падатках з адначасовым перамяшчэннем даходных крыніц да кан'юнктурных плацяжоў і непадатковых даходаў. Іх доля ў бюджэце павялічылася з 2010 па 2017 год з 11,5 працэнта да 26 працэнтаў. Акрамя таго, на фоне немагчымасці істотнага зніжэння дзяржаўных расходаў падатковая сістэма краіны за апошнія 10 гадоў была перанасычана вымушанымі кропкавымі выключэннямі сродкаў з эканомікі. З іншага боку, падатковая сістэма ўскладнена шматлікімі мэтавымі льготамі і спецыяльнымі рэжымамі, што не заўсёды прыносіць чаканы эфект у плане эканамічнага росту.
Намеснік міністра фінансаў таксама падкрэсліў, што важна браць пад увагу сфарміраваныя рызыкі разбалансіроўкі даходнай і расходнай частак бюджэту. У іх ліку наяўнасць знешніх фактараў і адпаведнай кан'юнктуры, даўгавая нагрузка, незбалансаванасць Фонду сацыяльнай абароны насельніцтва, а таксама абмежаваныя магчымасці па скарачэнні расходнай часткі бюджэту. У якасці прыкладу найбольш маштабных рызык ён назваў завяршэнне ў Расіі так званага падатковага манеўру, што ўплывае на фарміраванне даходных крыніц у Беларусі. "Нашай нафтаперапрацоўчай галіне давядзецца функцыянаваць фактычна ў рэжыме сусветных цэн на нафту, што дадаткова запатрабуе неабходнасць прыняцця ўнутраных кампенсацыйных мер па забеспячэнні яе эфектыўнасці. Размова, перш за ўсё, аб зніжэнні акцызаў", - заявіў Дзмітрый Кійко.
У выступленні намесніка міністра фінансаў размова таксама ішла аб кароткатэрміновых задачах на 2018 год па паляпшэнні якасных характарыстык падатковай сістэмы. Сярод іх прадастаўленне выбару спосабу выплаты падаткаў "па аплаце" або "па адгрузцы", збліжэнне бухгалтарскага і падатковага ўліку, падаткаабкладанне курсавых розніц, удасканаленне парадку прымянення падатковых вылікаў па ПДВ і ўмоў прымянення спрошчанай сістэмы падаткаабкладання. У ліку кароткатэрміновых задач таксама аптымізацыя правоў мясцовых Саветаў дэпутатаў па ўстанаўленні каэфіцыентаў да ставак маёмасных падаткаў, аптымізацыя дзеючага парадку ў сферы кантролю за трансфертным цэнаўтварэннем, нарміраванне асобных відаў расходаў для мэт вылічэння падатку на прыбытак.-0-
