21 лістапада, Барысаў /Кар. БЕЛТА/. Укараненне рэсурсазберагальных тэхналогій у вытворчасць з'яўляецца прыярытэтным напрамкам яе развіцця ў Беларусі, паколькі дае эканамічны і экалагічны эфект. Аб гэтым заявіў сёння намеснік міністра фінансаў Уладзіслаў Татарыновіч на адкрыцці першай у Беларусі вытворчасці офіснай паперы з макулатуры на УП "Папяровая фабрыка" Дзяржзнака ў Барысаве, перадае карэспандэнт БЕЛТА.
Праект "Садзейнічанне пераходу Рэспублікі Беларусь да зялёнай эканомікі" і яго фінансавая падтрымка Еўрапейскім саюзам далі магчымасць вызначыць стратэгічны напрамак развіцця. Гэта значыць укараненне рэсурсазберагальных тэхналогій, уключэнне ў абарот другасных матэрыяльных рэсурсаў. "Улічваючы заяўленыя Рэспублікай Беларусь прынцыпы зялёнай эканомікі, сённяшняе мерапрыемства - не разавая акцыя. Адкрыццё вытворчасці ў Барысаве - яскравы прыклад таго, калі адзін укладзены рубель або еўра дае сур'ёзны эфект. Мы не толькі ўкараняем сучасныя тэхналогіі, але і робім сур'ёзны крок да эканоміі энергетычных рэсурсаў", - адзначыў Уладзіслаў Татарыновіч.
Таксама ён запэўніў прысутных у тым, што барысаўская фабрыка - надзейны партнёр, які будзе рады прадаўжэнню супрацоўніцтва. Гэта пазней пацвердзіў і генеральны дырэктар прадпрыемства Аляксандр Мельнікаў, які на брыфінгу адзначыў, што разлічвае на дапамогу і ўрада, і еўрапейскіх партнёраў у завяршэнні праекта па фарміраванні поўнага цыкла перапрацоўкі макулатуры.
Пілотная ініцыятыва рэалізавана па маштабным праекце "Садзейнічанне пераходу Рэспублікі Беларусь да зялёнай эканомікі", які фінансуецца Еўрапейскім саюзам (агульны бюджэт - 5 млн еўра) і рэалізуецца ПРААН у партнёрстве з Міністэрствам прыродных рэсурсаў і аховы навакольнага асяроддзя. За сродкі ЕС створаная ў 2016 годзе на фабрыцы лінія перапрацоўкі макулатуры была даўкамплектавана дадатковымі вузламі і механізмамі. Праектам на закупку неабходнага найноўшага абсталявання італьянскай вытворчасці выдзелена 860 тыс. еўра.
Дзякуючы пілотнай ініцыятыве створаны тэхналагічны працэс з поўным цыклам ачысткі макулатуры і яе глыбокага роспуску. Гэта дае магчымасць вырабляць офісную паперу з макулатуры больш нізкай якасці. "Мы хочам давесці да завяршэння ўвесь праект: рэалізаваць трэцюю і чацвёртую чэргі, якія прадугледжваюць ачыстку сыравіны не толькі ад смецця, але і ад фарбы, а затым адбельванне. Тады з нізкасортнай макулатуры можна атрымліваць белую офісную паперу па нізкім сабекошце. Зрэшты, і папера, якая атрымліваецца цяпер, цалкам канкурэнтаздольная і падыходзіць для офіснай тэхнікі", - растлумачыў у размове з карэспандэнтам БЕЛТА Аляксандр Мельнікаў.
Вытворчае ўнітарнае прадпрыемства "Папяровая фабрыка" дэпартамента дзяржаўных знакаў Міністэрства фінансаў (фабрыка адзначыла 100-ы юбілей у кастрычніку 2002 года) выпускае сёння больш за 200 відаў папяровай прадукцыі. На прадпрыемстве наладжана гібкая высокамеханізаваная вытворчасць з закончаным цыклам - пачынаючы ад перапрацоўкі сыравіны і да прамых паставак спажыўцу гатовай прадукцыі (паперы ролевай, бланкаў, канвертаў і паштовак, школьных пісьмовых тавараў, этыкетак і прадукцыі ў фірменным стылі).-0-
