21 ліпеня, Гомель /Юлія Лысенка - БЕЛТА/. На Міжурадавую беларуска-казахстанскую камісію па гандлёва-эканамічным супрацоўніцтве ўскладзена важная роля ў паглыбленні адносін паміж дзвюма краінамі. Аб гэтым сёння на адкрыцці дванаццатага пасяджэння міжурадавай камісіі заявіў першы намеснік прэм'ер-міністра Беларусі Васіль Мацюшэўскі, які ўзначальвае беларускую частку камісіі, перадае карэспандэнт БЕЛТА.
Васіль Мацюшэўскі адзначыў, што сустрэча пачалася вельмі плённа, бакі паспелі ўжо абмеркаваць дзясятак пытанняў, правёўшы канструктыўны і глыбокі дыялог па перспектыўных тэмах. "Супрацоўніцтва з Рэспублікай Казахстан для нас самая прыярытэтная тэма. Прэзідэнты дзвюх краін заклалі моцны фундамент у гэтых узаемаадносінах. На міжурадавую камісію ўскладзена важная роля ў паглыбленні двухбаковых адносін", - сказаў ён.
Нягледзячы на тое, што тавараабарот дзвюх краін у 2015 годзе знізіўся ў параўнанні з 2014 годам на 40 працэнтаў, на думку Васіля Мацюшэўскага, у Беларусі і Казахстана ёсць усе неабходныя інструменты для нарошчвання ўзаемнага гандлю. "Беларускі бок нацэлены на рэалізацыю праектаў, якія адпавядаюць патэнцыялу нашых краін", - акцэнтаваў увагу кіраўнік беларускай часткі камісіі.
Пасяджэнне міжудавай камісіі прысвечана пытанням развіцця гандлёва-эканамічнага супрацоўніцтва Беларусі і Казахстана, бакі абмеркавалі ход выканання дарожнай карты на чарговы двухгадовы перыяд. Ключавым пытаннем парадку дня стала развіццё супрацоўніцтва ў галіне машынабудавання і вытворчай кааперацыі. Таксама абмеркаваны перспектывы супрацоўніцтва ў галіне сельскай гаспадаркі, транспарту і лагістыкі, праектавання і будаўніцтва, касмічнай і энергетычнай сферах, навукі і тэхналогіі, адукацыі, спорту, турызму. Прайшлі сустрэчы і перагаворы прадстаўнікоў беларускіх і казахстанскіх бізнес-колаў, казахстанская дэлегацыя наведала прамысловыя аб'екты Гомельскай вобласці.-0-
