17 верасня, Масква /Эдуард Півавар - БЕЛТА/. Маркіроўка харчовых прадуктаў у Еўразійскім эканамічным саюзе стане лягчэй чытацца і больш зразумелай. Гэта прадугледжана прынятымі Саветам Еўразійскай эканамічнай камісіі (ЕЭК) змяненнямі ў тэхнічны рэгламент ЕАЭС "Харчовая прадукцыя ў частцы яе маркіроўкі", паведамілі БЕЛТА ў прэс-службе ЕЭК.
"Савет ЕЭК удакладніў патрабаванні да маркіроўкі прадуктаў, што забяспечыць лепшую чытальнасць і ўспрыманне інфармацыі на спажывецкіх упакоўках, - адзначылі ў прэс-службе. - У прыватнасці, удакладнены крытэрыі паняццяў "лёгкачытальнасць", "зразумеласць", вызначаны патрабаванні да вышыні шрыфту, якім указваюцца асобныя звесткі пры маркіроўцы харчовай прадукцыі, уведзены патрабаванні да размяшчэння на ўпакоўцы звестак аб прыдуманай назве харчовай прадукцыі. Напрыклад, звесткі аб даце вытворчасці і тэрміне прыгоднасці ўказваюцца шрыфтам вышынёй не менш за 2 мм малой літары".
Крытэрыямі лёгкачытальнасці з'яўляюцца выразнасць і разборлівасць выкарыстанага ў маркіроўцы шрыфту, а таксама кантраст паміж колерам фону і колерам нанесенай на яго інфармацыі, што забяспечваюць магчымасць яе чытання без прымянення спецыяльных аптычных прыстасаванняў (за выключэннем акуляраў або кантактных лінзаў). Крытэрый "зразумеласці" - адназначнасць перадачы сэнсу інфармацыі аб прадукце ў форме тэксту або тэксту і карцінкі.
"Прадугледжаны тэрмін увядзення ў дзеянне змяненняў, што ўносяцца ў тэхрэгламент, - праз 180 каляндарных дзён з даты іх афіцыйнага апублікавання. Таксама для плаўнага пераходу на новую ўпакоўку плануецца пераходны перыяд - не менш як 24 месяцы з дня ўступлення ў сілу змяненняў у тэхрэгламент ЕАЭС", - дадалі ў ЕЭК.-0-
