23 жніўня, Мінск /Кар. БЕЛТА/. Для правядзення экспрэс-маніторынгу рынку лякарстваў (цэны, даступнасць, наяўнасць) у Міністэрстве антыманапольнага рэгулявання і гандлю з 23 жніўня па 18 верасня будзе адкрыта гарачая лінія. Такая інфармацыя размешчана на сайце МАРГ.
Па тэлефоне ў Мінску 8(017) 200-92-02 грамадзяне могуць паведамляць аб фактах росту цэн, розных цэнах на адны і тыя ж лякарствы ў розных аптэках (з пазначэннем суб'ектаў гаспадарання, іх адраса), аб адсутнасці ў продажы тых ці іншых прэпаратаў, а таксама аб іншых праблемных пытаннях, якія датычацца забяспечанасці лякарствамі. Званкі на гарачую лінію прымаюцца ў рабочыя дні з 9.00 да 13.00 і з 14.00 да 18.00.
Юрыдычныя асобы могуць паведамляць у МАРГ аб існуючых праблемных пытаннях вядзення бізнесу ў фармацэўтычнай галіне. "Кожны факт будзе вывучаны. Пры неабходнасці будуць прыняты меры ў адпаведнасці з заканадаўствам", - адзначылі ў міністэрстве.-0-
