25 студзеня, Мінск /Кар. БЕЛТА/. Латвія гатова абмяркоўваць з Беларуссю ўзаемавыгадныя ўмовы для прыцягнення ў свае парты беларускіх грузаў. Аб гэтым паведаміў сёння журналістам міністр зносін Латвіі Улдзіс Аўгуліс па выніках пасяджэння беларуска-латвійскай міжурадавай камісіі па эканамічным і навукова-тэхнічным супрацоўніцтве, перадае карэспандэнт БЕЛТА.
"Наконт скідак і астатняга прадаўжаецца работа. Учора быў дзелавы савет, дзе самі камерсанты маглі абмяркоўваць паміж сабой гэтыя пытанні. Нам трэба працаваць над тым, каб выгада была для абодвух бакоў", - адзначыў Улдзіс Аўгуліс.
Пры гэтым ён звярнуў увагу, што пад выгаднымі ўмовамі маецца на ўвазе не толькі прадастаўленне скідак. "Акрамя скідак, мае значэнне ўпэўненасць у сваім партнёры, хуткасць перавалкі грузу і іншыя моманты. Важна, якая скідка: на год, два гады або на большы прамежак часу, - дадаў Улдзіс Аўгуліс. - Таму трэба падсумаваць усе абставіны і тады прымаць рашэнне".
Міністр транспарту і камунікацый Беларусі Анатоль Сівак звярнуў увагу, што абмеркаванне ўмоў паставак у латвійскія парты - гэта пастаянная работа, якая вядзецца краінамі. "У сакавіку прадстаўнікі беларускіх чыгунак, латвійскіх чыгунак і партоў збяруцца і будуць дамаўляцца аб тарыфах на чарговы перыяд - гэта нармальная практыка пошуку кліентаў, трэба паказваць адпраўнікам грузаў перавагі таго ці іншага напрамку. Пытанне скідак прысутнічае заўсёды, груз ідзе туды, дзе больш выгадна", - сказаў Анатоль Сівак.
Беларусь і Латвія разам працуюць над транспартным калідорам для транзітных грузаў з Азіі, у тым ліку з Кітая, - перспектывы такога супрацоўніцтва таксама будуць абмяркоўваць на нарадзе транспартнікаў у сакавіку. "Мы рыхтуем праект пагаднення па перавозках у рамках Шаўковага шляху. Гэты дакумент датычыцца не толькі Міністэрства зносін Латвіі і Міністэрства транспарту і камунікацый Беларусі, мы працуем і з кітайскім Міністэрствам транспарту", - дадаў Анатоль Сівак. Паводле яго слоў, узгодненая работа ў гэтым плане дапаможа хуткаму развіццю Кітайска-беларускага індустрыяльнага парка. "Трэба ствараць адпаведную інфраструктуру, юрыдычную базу, вызначаць тарыфы, паколькі тавары будуць прыходзіць у парк у тым ліку па марскім шляху. Таксама трэба прадугледзець шляхі экспартных паставак і ўлічыць магчымасці партоў", - растлумачыў ён.
Сёння на пасяджэнні Беларусь і Латвія абмеркавалі гандлёва-эканамічнае супрацоўніцтва, узаемадзеянне ў лясной гаспадарцы, дрэваапрацоўцы, энергетыцы, сельскай гаспадарцы, харчовай прамысловасці, галіне транспарту і лагістыкі, будаўніцтве, турызме, адукацыі і іншых сферах. Па выніках пасяджэння падпісаны пратакол і пагадненне аб супрацоўніцтве паміж гандлёва-прамысловымі палатамі Беларусі і Латвіі.-0-
