Мабільная версія
ДЗЯРЖОРГАНЫ
Апошнія навіны
Усе навіны

Кабякоў: рашэнні пятага Усебеларускага сходу павінны актыўна рэалізоўвацца

Эканоміка 09.08.2016 | 15:18

9 жніўня, Мінск /Юлія Огнева - БЕЛТА/. Рашэнні пятага Усебеларускага народнага сходу павінны актыўна рэалізоўвацца, не чакаючы асобных даручэнняў, заявіў сёння прэм'ер-міністр Андрэй Кабякоў на пашыраным пасяджэнні Савета Міністраў, на якім разглядаліся вынікі работы эканомікі ў першым паўгоддзі і дадатковыя меры па выкананні пастаўленых на 2016 год задач, перадае карэспандэнт БЕЛТА.

"Адбыўся пяты Усебеларускі народны сход. Там прагучалі важнейшыя праграмныя ўстаноўкі. Мінэканомікі з зацікаўленымі практычна дапрацавала праект праграмы, які разгледзім у бліжэйшы час у пакеце з падрабязным планам мер, будзем рэалізоўваць. Асобных даручэнняў чакаць не трэба - рашэнні сходу павінны ўжо цяпер актыўна рэалізоўвацца", - адзначыў Андрэй Кабякоў.

Паводле яго слоў, новая эканоміка павінна стварацца на базе высокапрадукцыйных рабочых месц. "Правільнае выкарыстанне працоўных рэсурсаў - неад'емная ўмова дасягнення неабходнага эфекту", - падкрэсліў кіраўнік беларускага ўрада.

Ён нагадаў, што пытанне занятасці было разгледжана на асобным пасяджэнні Прэзідыума Савета Міністраў. "Рашэнне прынята: размяшчэнне прадукцыйных сіл, стварэнне рабочых месц у раёнах з найбольш складанай абстаноўкай на рынку працы, кіраванне гэтымі працэсамі павінна будавацца на базе кадравай дыягностыкі. Хто і што зрабіў, паглядзім у бліжэйшы час пры разглядзе праекта праграмы сацыяльна-эканамічнага развіцця Беларусі на 2016-2020 гады", - сказаў прэм'ер-міністр.

Андрэй Кабякоў канстатаваў, што важнейшай задачай рэальнага сектара эканомікі быў і застаецца экспарт. "За кошт зніжэння цэн на нафтапрадукты, прасядання рынку калійных угнаенняў за пяць месяцаў краіна недаатрымала $1,7 млрд экспартнай выручкі. Нягледзячы на штомесячны рост экспарту і тое, што ў фізічных аб'ёмах экспарт тавараў перавысіў узровень мінулага года на 1,1 працэнта, у поўным аб'ёме запоўніць гэтыя страты не ўдалося. Сальда знешняга гандлю склалася ніжэйшым за прагноз - па выніках паўгоддзя маем мінус 0,7 працэнта ВУП пры заданні плюс 0,2 працэнта па выніках года", - адзначыў ён.

На яго думку, кампенсаваць неспрыяльную цэнавую кан'юнктуру можам толькі шляхам нарошчвання паставак прадукцыі ў натуральным выражэнні. "Іншага шляху ў нас няма. Гэта стратэгія закладзена ва ўсіх праграмных дакументах. Краіне патрэбна валюта", - канстатаваў кіраўнік беларускага ўрада.

Ён сказаў, што ў цэлым зніжаецца знешняя дэбіторская запазычанасць - на $840 млн у параўнанні з 1 ліпеня 2015 года да $3,6 млрд на 1 ліпеня 2016 года. Больш як чвэрць гэтай запазычанасці фарміруюць прамысловыя флагманы: БелАЗ, МТЗ, "Гомсельмаш", "Белшына". "Наяўнасць самой знешняй дэбіторкі - гэта нармальна. Пытанне ў наяўнасці пратэрмінаванай запазычанасці. Пратэрмінаваная знешняя дэбіторская запазычанасць у чэрвені знізілася на $3 млн і на 1 ліпеня склала $571 млн. Але за паўгода - з 1 студзеня - яна вырасла на $8 млн, або на 1,5 працэнта, - адзначыў Андрэй Кабякоў. - Нагадваю: патрабаванні Прэзідэнта, замацаваныя ва ўказе нумар 78, аб неабходнасці зніжэння знешняй пратэрмінаванай дэбіторскай запазычанасці на $100 млн павінны быць няўхільна выкананы. Пакуль за паўгоддзе ў нас адваротная тэндэнцыя".

Прэм'ер-міністр падкрэсліў, што зніжэнне сабекошту - адзін з асноўных элементаў павышэння канкурэнтаздольнасці прадукцыі на ўнутраным і знешнім рынках і, як вынік, значнага паляпшэння плацежнага балансу краіны. "Патрабаванні кіраўніка дзяржавы - забяспечыць зніжэнне сабекошту мінімум на 25 працэнтаў. Гэта патрабаванне ў першым паўгоддзі пакуль не выканана", - канстатаваў ён і даручыў унесці канкрэтныя прапановы па вырашэнні гэтай задачы.

"Нягледзячы на наяўнасць дадатных тэндэнцый і шэрага аб'ектыўных фактараў, якія паўплывалі на работу эканомікі, вынікі нашай работы нельга прызнаць здавальняючымі. Кожнаму кіраўніку павінна быць дадзена справядлівая ацэнка", - рэзюмаваў Андрэй Кабякоў.-0-

Версія для друку
Навіны рубрыкі Эканоміка
Надвор'e
Мінск
Баранавічы
Бабруйск
Барысаў
Брэст
Варшава
Вільнюс
Віцебск
Гомель
Гродна
Жлобін
Кіеў
Ліда
Мінск
Магілёў
Мозыр
Масква
Орша
Полацк
Рыга
Санкт-Пецярбург
Салігорск

Інфаграфіка

Бяспечны электраабагравальнік Рэкамендуецца: - уважліва чытаць інструкцыю, звяртаць увагу на час эксплуатацыі прыбора і патрабаванні па дапушчальным току; - трымаць электрапрыбор на бяспечнай адлегласці ад фіранак і мэблі і г.д.