15 верасня, Мінск /Кар. БЕЛТА/. Беларусь зацікаўлена ў канструктыўным дыялогу з міжнароднай бізнес-супольнасцю, заявіў прэм'ер-міністр Андрэй Кабякоў сёння на сустрэчы з актывам Міжнароднага кангрэса прамыслоўцаў і прадпрымальнікаў, перадае карэспандэнт БЕЛТА.
Андрэй Кабякоў падзякаваў за выбар Беларусі ў якасці пляцоўкі для правядзення XI Асамблеі Міжнароднага кангрэса прамыслоўцаў і прадпрымальнікаў, якая адкрываецца сёння ў Мінску. "Мы рады прымаць у сябе прадстаўнікоў дзелавых колаў, нацыянальных саюзаў, міжнародных арганізацый і дыпламатычнага корпуса з больш як 20 краін. Беларусь зацікаўлена ў адкрытым і канструктыўным дыялогу з міжнароднай бізнес-супольнасцю, асабліва па пытаннях узаемавыгаднага супрацоўніцтва, развіцця бізнесу, нарошчвання прамысловага і інвестыцыйнага патэнцыялу. Нам у гэтым плане ёсць што абмеркаваць і ёсць што прапанаваць", - адзначыў прэм'ер-міністр.
Паводле яго слоў, нягледзячы на ўсе цяжкасці, унутраныя і знешнія праблемы, у Беларусі забяспечваецца макраэканамічная збалансаванасць, устойлівасць на фінансавым і валютным рынках. Значна палепшылася сітуацыя на крэдытна-дэпазітным рынку. Стаўкі па крэдытах для рэальнага сектара эканомікі істотна зніжаны. Стабільны валютны і цэнавы фон далі магчымасць толькі ў 2017 годзе на 8,2 працэнтнага пункта знізіць цану пазыкі для рэальнага сектара. Забяспечваецца знешнегандлёвы баланс. Сальда гандлю таварамі і паслугамі за студзень-ліпень 2017 года склалася дадатнае для Беларусі ў памеры $490 млн. Зніжэнне ўплыву манетарных фактараў дало магчымасць выйсці на мінімальны за апошняе дзесяцігоддзе прырост інфляцыі. Паляпшаюцца і агульныя фінансавыя паказчыкі работы эканомікі. Разам з тым ёсць і праблемы, якія паэтапна вырашаюцца, канстатаваў кіраўнік урада.
Як і любая іншая краіна, Беларусь зацікаўлена ў супрацоўніцтве з міжнароднымі карпарацыямі. "Ва ўмовах вялікай канкурэнцыі, а лепш сказаць - жорсткай барацьбы за інвестыцыі і тэхналогіі Беларусь пастаянна працуе над паляпшэннем інвестклімату і ўмоў для стварэння і функцыянавання вытворчасцей. У нас дзейнічае даволі развітае інвестыцыйнае заканадаўства з рознымі прэферэнцыйнымі рэжымамі", - звярнуў увагу прэм'ер-міністр. Гэта стварае эканамічныя перадумовы для прыцягнення інвестараў і размяшчэння імі свайго бізнесу, асабліва ў малых і сярэдніх гарадах і сельскай мясцовасці, у свабодных эканамічных зонах, Кітайска-беларускім індустрыяльным парку "Вялікі камень", Парку высокіх тэхналогій.
Індустрыяльны парк "Вялікі камень" арыентаваны на развіццё высокатэхналагічнай прамысловасці, лагістыкі, стварэнне навукаёмістых вытворчасцей. Парк высокіх тэхналогій з'яўляецца адным з буйнейшых ІТ-кластараў у Цэнтральнай і Усходняй Еўропе. Унікальнасць ПВТ - у спалучэнні якасці тэхнічнай адукацыі, прафесіяналізму ІТ-спецыялістаў і дзяржаўнай падтрымкі галіны ІКТ. ПВТ прадугледжвае асаблівы прававы рэжым і сістэму падаткаабкладання. Кампаніі-рэзідэнты вызваляюцца ад усіх карпаратыўных падаткаў, уключаючы ПДВ і падатак на прыбытак.
У Беларусі функцыянуюць шэсць свабодных эканамічных зон са спецыяльным мытным, рэгістрацыйным і падатковым рэжымамі. "Усе прапануемыя на выбар інвестару рэжымы і тэрыторыі маюць сур'ёзныя падатковыя, мытныя і іншыя прэферэнцыі пры гарантаванай дзяржавай абароне інвестыцый", - падкрэсліў прэм'ер-міністр.
Андрэй Кабякоў таксама нагадаў, што ўрад працуе над стварэннем максімальна спрыяльных умоў для фарміравання і функцыянавання прадпрымальніцкага асяроддзя. У цесным узаемадзеянні з бізнес-супольнасцю падрыхтаваны беспрэцэдэнтны пакет дакументаў па ўдасканаленні ўмоў вядзення бізнесу, выключэнні залішніх патрабаванняў, што выстаўляюцца да бізнесу, і ўключэнні насельніцтва ў актыўную эканамічную дзейнасць.
"Беларусь адкрыта і гатова да рэалізацыі сумесных праектаў, да партнёрства ў вырашэнні важнейшых стратэгічных пытанняў эканамічнага развіцця. Мяркую, што праводзімы ў нашай краіне Міжнародны кангрэс прамыслоўцаў і прадпрымальнікаў несумненна надасць імпульс у развіцці эканамічных адносін паміж кампаніямі нашых краін, максімальнаму скарачэнню адміністрацыйных бар'ераў для эканамічнага супрацоўніцтва", - рэзюмаваў кіраўнік урада.
Міжнародны кангрэс прамыслоўцаў і прадпрымальнікаў - грамадская няўрадавая арганізацыя, створаная ў 1992 годзе. Цяпер яго членамі з'яўляюцца нацыянальныя дзелавыя саюзы, прадпрымальніцкія аб'яднанні і арганізацыі работадаўцаў з Азербайджана, Арменіі, Беларусі, Балгарыі, Венгрыі, Грэцыі, Грузіі, Італіі, Казахстана, Кыргызстана, Латвіі, Літвы, Македоніі, Малдовы, Польшчы, Расіі, Румыніі, Сербіі, Славеніі, Таджыкістана, Узбекістана, Украіны, Чэхіі, Эстоніі.
XI Асамблея Міжнароднага кангрэса прамыслоўцаў і прадпрымальнікаў праходзіць у Мінску 15 верасня. Дэлегаты і госці форуму будуць абмяркоўваць актуальныя праблемы міжнароднага эканамічнага супрацоўніцтва, ролю бізнес-супольнасцей краін-партнёраў у развіцці сучасных рыначных узаемаадносін. Удзельнікі асамблеі МКПП маюць намер азнаёміцца з работай шэрага беларускіх прадпрыемстваў і грамадскіх структур, разгледзець магчымасці сумеснай рэалізацыі праграм і праектаў.-0-
