Сцяг Пятніца, 29 сакавіка 2024
Усе навіны
Усе навіны
Эканоміка
22 жніўня 2017, 15:47

Кабякоў анансаваў павышэнне стаўкі першага разраду

22 жніўня, Мінск /Кар. БЕЛТА/. Стаўку першага разраду плануецца павысіць у Беларусі ў бліжэйшы час. Аб гэтым паведаміў сёння журналістам прэм'ер-міністр Андрэй Кабякоў па выніках нарады ў кіраўніка дзяржавы, перадае карэспандэнт БЕЛТА.

"З улікам аптымізацыі, якая праходзіла ў органах дзяржкіравання і сілавым блоку, работы па зніжэнні затрат у бюджэтнай сферы ў цэлым падрыхтаваны прапановы ўрада. Думаю, у бліжэйшы час Прэзідэнт іх разгледзіць і будзе прынята рашэнне па руху тарыфнай стаўкі першага разраду. Лічбы пакуль агучваць не буду. Але, думаю, літаральна дзень-два - і такое рашэнне будзе прынята", - сказаў Андрэй Кабякоў.

Паводле яго слоў, у час нарады Аляксандр Лукашэнка даручыў звярнуць асаблівую ўвагу на тыя катэгорыі работнікаў бюджэтнай сферы, якія маюць мінімальныя даходы. "Пры з'яўленні магчымасці па павелічэнні заработных плат яны будуць разглядацца ў якасці прыярытэтных", - звярнуў увагу прэм'ер-міністр.

Андрэй Кабякоў адзначыў тэндэнцыю да росту рэальных даходаў насельніцтва. Тэмп росту гэтага паказчыка па выніках года прагназуецца на ўзроўні 102,7 працэнта."У прадпрыемстваў і ў галінах з'явілася магчымасць разгледзець пытанні змянення зарплаты ў бок павелічэння. Нязменным патрабаванне застаецца і для прадпрыемстваў камерцыйнага сектара. Там, дзе прадпрыемствы зарабляюць самі, тэмпы росту прадукцыйнасці працы павінны быць вышэйшыя, чым тэмпы росту зарплаты. Гэта патрабаванне выконваецца", - адзначыў прэм'ер.-0-

Падпісвайцеся на нас у
Twitter
Топ-навіны
Свежыя навіны Беларусі