26 мая, Мінск /Уладзімір Мацвееў - БЕЛТА/. Інфляцыя ў Беларусі ў 2020 годзе плануецца на ўзроўні 5 працэнтаў. Аб гэтым пасля нарады ў кіраўніка дзяржавы па праекце асноўных палажэнняў Праграмы сацыяльна-эканамічнага развіцця Беларусі на 2016-2020 гады паведаміў журналістам Андрэй Кабякоў, адказваючы на пытанне карэспандэнта БЕЛТА.
Аб адпаведных меркаваннях прэм'ер-міністр расказаў у кантэксце размовы аб механізмах, якія садзейнічаюць росту эфектыўнага інвесціравання. "Механізмы для інвестыцый традыцыйныя. Перш за ўсё максімальнае ўключэнне ўласных сродкаў прадпрыемстваў. І адпаведнае ўдасканаленне параметраў грашова-крэдытнай палітыкі. Макраэканамічная стабілізацыя, аб якой вядзе размову ўрад, павінна прывесці да таго, што да канца пяцігодкі стаўкі па крэдытах, у тым ліку новавыдаваемых, павінны быць на ўзроўні 10-12 працэнтаў. Прытым што інфляцыя ў краіне, мы мяркуем, будзе на ўзроўні 5 працэнтаў у 2020 годзе", - заявіў Андрэй Кабякоў.
Ён нагадаў, што нядаўна з'явілася магчымасць прыцягваць інвестыцыі са знешніх рынкаў з дапамогай дэпазітарных распісак. "Гэта таксама даволі цікавы інструмент для прыцягнення інвестыцый у акцыянерны капітал нашых прадпрыемстваў", - адзначыў прэм'ер-міністр.
Усе інструменты прыцягнення інвестыцый павінны быць у максімальнай ступені задзейнічаны і прымяняцца ў тых выпадках, калі яны даюць максімальны эфект. "Гэта значыць няма нейкага непрымання, каб прыцягнуць прыватны капітал у акцыянерны капітал прадпрыемства з пераважнай дзяржуласнасцю. Калі гэта прыцягненне будзе садзейнічаць больш эфектыўнай рабоце, павялічыцца заработная плата і будуць гарантаваны рабочыя месцы. Вядома, такія інвестыцыі трэба вітаць", - падкрэсліў Андрэй Кабякоў.
Адначасова ён адзначыў, што і дзяржпрадпрыемствы павінны ў максімальнай ступені эфектыўна праводзіць інвесціраванне, арыентуючыся на фінансавы вынік. "Вы ведаеце, што ўрад скарэкціраваў паказчык для прадпрыемстваў ужо і на 2016 год, дзе галоўным крытэрыем эфектыўнасці работы з'яўляецца чысты прыбытак прадпрыемства. І мы адышлі ад давядзення валавых паказчыкаў па галінах", - сказаў прэм'ер-міністр.
"Прэзідэнт пацвердзіў яшчэ раз, што рыначныя інструменты павінны ў максімальнай ступені эфектыўна выкарыстоўвацца. Чалавек павінен быць свабодным у рыначнай эканоміцы і мець магчымасць прыкласці сілы, талент і тыя сродкі, якія ў яго ёсць, каб зрабіць сваё жыццё лепшым", - рэзюмаваў Андрэй Кабякоў.-0-
