12 кастрычніка, Мінск /Кар. БЕЛТА/. ФПБ па выніках маніторынгу адзначае зніжэнне цэн на свініну і некаторыя крупы. Аб гэтым сёння журналістам паведаміў старшыня Федэрацыі прафсаюзаў Беларусі Міхаіл Орда, перадае карэспандэнт БЕЛТА.
Міхаіл Орда канстатаваў, што маніторынг цэн на прадукты праводзіцца з мая. "Сёння мы можам сказаць, што за апошнія тры месяцы - квартал - бачым стабілізацыю цэн. Акрамя таго па шэрагу прадуктаў назіраем няхай нязначнае, але зніжэнне цэн", - заявіў ён.
Устойлівае зніжэнне цэн адзначана на свініну, манныя, аўсяныя і грэцкія крупы. Аднак цэны на кефір, тварог, пшанічную муку, жытнёва-пшанічны хлеб, сухія малочныя сумесі для дзіцячага і дыетычнага харчавання выраслі. "Асабліва нас насцярожвае рост цэн на сухія малочныя дзіцячыя сумесі. Гэта датычыцца ў першую чаргу маладых сем'яў з маленькімі дзецьмі - найбольш слабаабароненай групы, дзе не такія вялікія даходы. Мы будзем уважліва сачыць за гэтым пытаннем і пры неабходнасці будзем інфармаваць структуры, якія адказваюць за цэнаўтварэнне, каб яны маглі растлумачыць абгрунтаванасць узняцця цэн", - адзначыў Міхаіл Орда.
Прадаўжаюцца сезонныя ваганні цэн на плодаагароднінную прадукцыю. З-за павелічэння прапанаванняў сельгасвытворцаў у верасні значна знізіліся цэны на бульбу, моркву, буракі, капусту, але цэны на таматы і агуркі (на фоне жнівеньскага зніжэння) у верасні выраслі амаль на трэць.
Маніторынг цэн на прадукты харчавання праводзіўся з мая па ліпень па ўсіх абласцях і Мінску ў 41 раёне, у 122 магазінах па 33 таварных пазіцыях. Пачынаючы са жніўня ахоп быў пашыраны як тэрытарыяльна, так і па колькасці тавару. Маніторынгам цяпер ахоплены 274 магазіны ва ўсіх раёнах. Цэны кантралююцца па 98 найменнях прадуктаў.
Беларускім прафсаюзам работнікаў гандлю ў чэрвені і жніўні-верасні праводзіўся маніторынг кошту адзення, бялізны і абутку. У цэлым павелічэнне цэн на адзенне спажывецкай карзіны адбылося нязначна - да 2 працэнтаў за квартал.
Акрамя таго, у ліпені праведзены маніторынг набораў адзення, бялізны, абутку і канцылярскіх прылад для падрыхтоўкі дзяцей да школы. Паводле даных прафсаюзнага маніторынгу цэн, расходы на экіпіроўку школьнікаў у параўнанні з данымі 2016 года выраслі ад 2 працэнтаў да 5 працэнтаў.
Не было адзначана істотных ваганняў цэн на медыкаменты. З пачатку года па дзяржаўнай сістэме фармацыі назіраецца зніжэнне цэн на лекавыя прэпараты на 3,2 працэнта. У той жа час на частку прэпаратаў замежных вытворцаў захоўваецца кошт вышэйшы, чым у Расіі, Украіне і Польшчы. Прадстаўнікі Беларускага прафсаюза работнікаў аховы здароўя ўваходзяць у склад камісіі пры Міністэрстве аховы здароўя, якая штодзень праводзіць работу з замежнымі пастаўшчыкамі, накіраваную на зніжэнне цэн. Міністэрства аховы здароўя рэалізуе комплекс мер па зніжэнні цэн на айчынныя прэпараты, а таксама лякарствы замежнай вытворчасці (шэраг найменняў) да іх узроўню ў сумежных дзяржавах.
ФПБ для прыняцця далейшых мер аб выніках народнага кантролю і тэндэнцыях аператыўна інфармуе дзяржаўныя органы.-0-
