6 ліпеня, Мінск /Марта Астрэйка - БЕЛТА/. Перспектывы інвестыцыйнага супрацоўніцтва, вытворчай кааперацыі, стварэння сумесных прадпрыемстваў па зборцы беларускай аўтамабільнай і сельскагаспадарчай тэхнікі, выпуску іншай высокатэхналагічнай прадукцыі абмяркоўваліся на сустрэчы пасла Беларусі ў Эквадоры Ігара Палуяна з эквадорскім міністрам прамысловасці Эвай Гарсія Фабрэ. Аб гэтым карэспандэнту БЕЛТА паведамілі ў дыпламатычнай місіі ў Кіта.
Рэалізацыя сумесных праектаў у гэтых сферах дасць магчымасць як забяспечваць патрэбнасці эквадорскага рынку, так і пастаўляць адпаведную прадукцыю на экспарт у суседнія краіны Паўднёвай Амерыкі, растлумачылі ў пасольстве.
Ігар Палуян і саветнік пасольства Георгій Кісляк правялі прэзентацыю эканамічнага, аграпрамысловага, навукова-тэхнічнага і адукацыйнага патэнцыялу Беларусі.
"Эквадорскі бок выказаў зацікаўленасць у вывучэнні беларускага вопыту стварэння сучасных прамысловых прадпрыемстваў. У гэтым кантэксце ўдзельнікі перагавораў абмяняліся думкамі наконт магчымасці арганізацыі ў бліжэйшы час візітаў у Беларусь эквадорскіх афіцыйных дэлегацый і дзелавых місій", - адзначылі ў дыпмісіі.-0-
