17 мая, Мінск /Кар. БЕЛТА/. Еўразійскі эканамічны саюз (ЕАЭС) і Іран падпісалі сёння часовае пагадненне аб зоне свабоднага гандлю, якое прызначана павялічыць гандлёвы абарот паміж краінамі за кошт аблягчэння мытнага рэжыму, паведамляе ТАСС.
"Цяпер у пагадненне ўключаны першапачатковы пералік тавараў, па якіх увазныя пошліны ва ўзаемным гандлі будуць зніжаны або ліквідаваны пасля ўступлення ў сілу пагаднення. Ахоп пагаднення - 50 працэнтаў аб'ёму ўзаемнага гандлю", - заявіў старшыня калегіі Еўразійскай эканамічнай камісіі Тыгран Саргсян на эканамічным форуме ў Астане. Ён удакладніў, што аб'ём гандлю паміж ЕАЭС і Іранам у 2017 годзе склаў $2,7 млрд.
Тыгран Саргсян адзначыў, што пасля ўступлення пагаднення ў сілу краіны ЕАЭС і Іран змогуць эканоміць на выплаце ўвазных мытных пошлін. У пералік для ЕАЭС уваходзіць мясная і алейна-тлушчавая прадукцыя, асобныя віды кандытарскіх вырабаў і шакаладу, касметыка, віды электроннага і механічнага абсталявання. Іранскі бок атрымае тарыфныя прэферэнцыі па разгорнутым спісе харчовай прадукцыі - агародніне, фруктах, сухафруктах, будматэрыялах.
"Па прамысловых таварах сярэдні ўзровень ставак увазных пошлін Ірана знізіцца на 7 працэнтных пунктаў, а для краін саюза - на 3,5 пункта, па сельскагаспадарчых таварах для Ірана яны знізяцца на 19 пунктаў, для ЕАЭС - на 5 пунктаў", - расказаў Тыгран Саргсян.
Паводле яго слоў, поўнафарматнае пагадненне паміж ЕАЭС і Іранам можа быць падпісана праз тры гады.-0-
