19 лютага, Мінск /Вера Сяргеева - БЕЛТА/. Усе дакументы па дэкрэце нумар 7 у сферы будаўніцтва будуць прыняты ў канцы лютага - пачатку сакавіка. Аб гэтым паведаміў сёння журналістам намеснік міністра архітэктуры і будаўніцтва Беларусі Дзмітрый Семянкевіч, перадае карэспандэнт БЕЛТА.
"Амаль 80 працэнтаў дакументаў у веданні Мінбудархітэктуры прайшлі ўжо ўсе неабходныя працэдуры ўзгаднення, гатовы да зацвярджэння Саветам Міністраў. Ёсць вектары, якія патрабуюць удзелу вялікай колькасці суб'ектаў. Па плане, у канцы лютага - пачатку сакавіка павінны быць прыняты ўсе дакументы", - сказаў Дзмітрый Семянкевіч.
Ён таксама адзначыў, што цяпер знаходзіцца ў стадыі ўзгаднення пастанова ўрада нумар 223 аб дазвольнай дакументацыі. "Там павінны быць адрэгуляваны моманты, звязаныя з выдачай дазвольнай дакументацыі на будаўніцтва, вызначаны пералік дазвольнай дакументацыі і віды будаўніцтва, па якіх яе неабходна атрымліваць. Разглядаецца таксама прапанова аб спрашчэнні працэдур для прыватнага сектара", - растлумачыў намеснік міністра.-0-