20 жніўня, Мінск /Кар. БЕЛТА/. Зарплату ў памеры Br1 тыс. і вышэйшую ў Беларусі атрымліваюць крыху больш за 25 працэнтаў работнікаў. Аб гэтым паведаміла сёння журналістам старшыня Нацыянальнага статыстычнага камітэта Беларусі Іна Мядзведзева, перадае карэспандэнт БЕЛТА.
Двойчы ў год Белстат праводзіць абследаванне і публікуе даныя аб медыяннай заработнай плаце (яе атрымлівае работнік, які знаходзіцца ў сярэдзіне зарплатнага спіса). Зыходзячы з гэтых абследаванняў можна прасачыць, у тым ліку па галінах эканомікі, які працэнт працуючых атрымлівае сярэднюю зарплату, які вышэйшую, а які ніжэйшую. Так, па выніках майскіх даных справаздачнасці наймальнікаў, да Br200 атрымліваюць 1,2 працэнта работнікаў, Br200-300 - 2 працэнты, Br300-400 - 12,1 працэнта, Br400-500 і Br500-600 - па 11,5 працэнта, Br600-700 - 10,8 працэнта, Br700-800 - 9,8 працэнта, Br800-1000 - 15,4 працэнта, Br1-1,5 тыс. - 17,2 працэнта, Br1,5-2 тыс. - 4,9 працэнта і звыш Br2 тыс. - 3,6 працэнта.
"Мы бачым дадатную дынаміку. Гэта важна, каб стварыць нармальныя ўмовы жыцця. Зыходзячы з гэтых даных, упэўнены: заданне Прэзідэнта Беларусі па сярэдняй заработнай плаце ў памеры Br1 тыс. будзе выканана. Мы бачым рух да атрымання гэтай велічыні ў сярэдзіне патрэбнага дыяпазону", - сказала Іна Мядзведзева.
Да гэтага часу Белстат запытваў інфармацыю аб атрыманні заработнай платы і размеркаванні яе памераў да Br2 тыс. Звыш гэтай сумы даныя аб атрымальніках такога заработку былі агульнымі - адной лічбай. "Але цяпер мы пашырылі дыяпазон атрымання даных ад нашых рэспандэнтаў і ў далейшым будзем мець больш разгорнутую інфармацыю аб высокааплатнай катэгорыі", - дадала Іна Мядзведзева.
Кіраўнік Белстата адзначыла, што людзі, гледзячы на публікуемыя даныя аб сярэдняй заработнай плаце па краіне і інфляцыі, часта не разумеюць, адкуль такое разыходжанне з іх асабістай сітуацыяй. Іна Мядзведзева растлумачыла, што трэба разглядаць лічбу намінальнай налічанай сярэднямесячнай зарплаты менавіта як сярэднюю велічыню, а не тое, колькі атрымлівае большасць. Пры вылічэнні выкарыстоўваюцца даныя фонду заработнай платы, якія суадносяцца з інфармацыяй аб занятых у эканоміцы. "Тое ж датычыцца інфляцыі: у кожнага чалавека свой спажывецкі кошык", - адзначыла Іна Мядзведзева.-0-
