19 снежня, Мінск /Кар. БЕЛТА/. Пагадненне аб стратэгічным супрацоўніцтве ДВА "Белэнерга" і АТ "Расійскі экспартны цэнтр" пры сумеснай рэалізацыі праектаў у сферы электраэнергетыкі падпісана сёння ў Мінску, перадае карэспандэнт БЕЛТА. Папярэдні аб'ём супрацоўніцтва па праектах з выкарыстаннем расійскага абсталявання ацэньваецца на суму да $300 млн.
Пагадненне мае не дэкларатыўны, а выключна практычны характар. Дакумент выводзіць на якасна новы ўзровень узаемадзеянне прадпрыемстваў энергетычнага комплексу Беларусі з расійскімі вытворцамі электратэхнічнага абсталявання пры актыўнай падтрымцы з боку Расійскага экспартнага цэнтра. Такім чынам, можна гаварыць аб пазітыўнай ролі РЭЦ і ЭКСАР, што ўваходзіць у яго групу, у справе развіцця кааперацыйных сувязей паміж расійскімі і беларускімі суб'ектамі гаспадарання ў Еўразійскім эканамічным саюзе.
"Расійскае агенцтва па страхаванні экспартных крэдытаў і інвестыцый (ЭКСАР) у 2016 годзе збіраецца выйсці на паказчыкі агульнай падтрымкі расійскага экспарту ў аб'ёме каля $8 млрд, з якіх як мінімум $1 млрд прыпадзе на супрацоўніцтва з Беларуссю. Такім чынам, Беларусь з'яўляецца прыярытэтным партнёрам для нашага агенцтва, - адзначае генеральны дырэктар АТ "ЭКСАР" Аляксей Цюпанаў. - ЭКСАР прадастаўляе магчымасць арганізацыі звязанага фінансавання пад экспартныя пастаўкі з Расіі па больш ільготных, у параўнанні з рыначнымі, умовах. У выніку здымаюцца рызыкі расійскіх экспарцёраў і забяспечваецца прыток інвестыцый у Беларусь. Прычым размова ідзе не толькі аб гандлі, але таксама аб расійска-беларускіх праектах у рэальным сектары, у тым ліку ў рамках работы з малым і сярэднім бізнесам".
АТ "ЭКСАР" праз сваё прадстаўніцтва ў Беларусі актыўна працуе ў партнёрстве з беларускімі банкамі і страхавымі арганізацыямі і можа істотна дапаўняць фінансавымі магчымасцямі і інструментамі рычаг падтрымкі беларуска-расійскіх экспартна-імпартных аперацый. Акрамя практычнай дапамогі ў рэалізацыі сумесных праектаў прадстаўніцтва АТ "ЭКСАР" у Беларусі вялікую ўвагу ўдзяляе інфармаванню бізнес-супольнасці аб новых магчымасцях фінансавай і нефінансавай падтрымкі экспарту. Паспяхова прымяняюцца прадукты і лепшы міжнародны вопыт, якія даюць магчымасць эфектыўна падтрымліваць і развіваць экспартна арыентаваныя праекты.
Падпісанне пагаднення аб стратэгічным супрацоўніцтве ДВА "Белэнерга" і АТ "Расійскі экспартны цэнтр" адбылося ў час урачыстага мерапрыемства "Група РЭЦ у Рэспубліцы Беларусь: вынікі і перспектывы пашырэння экспартных праектаў і інвестыцый". Мерапрыемства прайшло ў рамках абмеркавання магчымасцей для пашырэння супрацоўніцтва ў галіне арганізацыі сумесных праектаў і развіцця экспартнага патэнцыялу Беларусі і Расіі. Форум прымеркаваны да гадавіны дзейнасці прадстаўніцтва АТ "ЭКСАР" у Беларусі, якое з'яўляецца часткай групы РЭЦ і створана як першае замежнае прадстаўніцтва ЭКСАР.
Дзяржаўнае вытворчае аб'яднанне электраэнергетыкі "Белэнерга" падпарадкавана Міністэрству энергетыкі Беларусі. Прадметам дзейнасці ДВА "Белэнерга" з'яўляецца арганізацыя надзейнага, бяспечнага, эканамічна эфектыўнага функцыянавання і інавацыйнага развіцця вытворчасці, перадачы, размеркавання і продажу электрычнай і цеплавой энергіі.
Расійскі экспартны цэнтр (РЭЦ) створаны ў якасці спецыялізаванай арганізацыі, якая прадстаўляе адзінае акно для работы з экспарцёрамі ў галіне фінансавых і нефінансавых мер падтрымкі, у тым ліку праз узаемадзеянне з профільнымі міністэрствамі і ведамствамі, якія ажыццяўляюць функцыі па развіцці знешнеэканамічнай дзейнасці Расіі. З пачатку 2016 года праведзена функцыянальнае аб'яднанне кампаній Групы РЭЦ, у склад якой інтэграваны АТ "Расійскі экспартны цэнтр", Расійскае агенцтва па страхаванні экспартных крэдытаў і інвестыцый (ЭКСАР) і АТ "Расэксімбанк".
Расійскае агенцтва па страхаванні экспартных крэдытаў і інвестыцый (ЭКСАР) створана ў 2011 годзе. Яго асноўная мэта - падтрымка высокатэхналагічнага экспарту з дапамогай страхавання крэдытных і палітычных рызык па экспартных крэдытах і страхаванні расійскіх інвестыцый за мяжой ад палітычных рызык. З 10 снежня 2015 года адзіным акцыянерам ЭКСАР з'яўляецца АТ "Расійскі экспартны цэнтр". 25 верасня 2015 года адкрыта прадстаўніцтва АТ "ЭКСАР" у Беларусі.-0-
