26 верасня, Мінск /Кар. БЕЛТА/. БелАЗ па выніках 2018 года павялічыць вытворчасць да 800 самазвалаў, што на 30 працэнтаў больш, чым у 2017 годзе. Аб гэтым паведаміў 25 верасня журналістам генеральны дырэктар прадпрыемства Пётр Пархомчык, перадае карэспандэнт БЕЛТА.
"У 2017 годзе быў зафіксаваны рэзкі скачок усіх фінансава-эканамічных паказчыкаў прадпрыемства. Было выраблена 615 кар'ерных самазвалаў, прададзена 646. У першым паўгоддзі бягучага года ўжо выраблена 407 самазвалаў, па выніках года лічба будзе блізкай да 800 кар'ерных самазвалаў", - адзначыў Пётр Пархомчык.
Ён таксама падкрэсліў, што БелАЗ ужо выйшаў на паказчыкі 2017 года. "Попыт на кар'ерныя самазвалы ў 2017 годзе павялічыўся, што паўплывала на экспарт, павелічэнне чыстага прыбытку", - дадаў гендырэктар прадпрыемства.
ААТ "БелАЗ" - кіруючая кампанія холдынга "БелАЗ-Холдынг" - прамысловая вытворчасць кар'ернага і спецыялізаванага транспарту з выкарыстаннем інавацыйных тэхналогій. За 70-гадовую гісторыю прадпрыемства выпушчана больш за 500 розных мадыфікацый кар'ерных самазвалаў і машын спецыяльнага прызначэння, сабрана 146 тыс. адзінак тэхнікі, геаграфія паставак налічвае 80 краін. Сёння прадпрыемства мае самую шырокую лінейку самазвалаў у свеце.-0-
