29 жніўня, Мінск /Кар. БЕЛТА/. Беларуска-расійскі фонд венчурных інвестыцый прафінансуе першыя праекты ў бягучым годзе, паведаміў карэспандэнту БЕЛТА старшыня Дзяржаўнага камітэта па навуцы і тэхналогіях (ДКНТ) Аляксандр Шумілін у час рэспубліканскага спартыўнага фестывалю працуючай моладзі "Алімпія-2016".
"Па беларуска-расійскім венчурным фондзе ўказ падпісаны. Мы плануем у верасні выйсці на падпісанне дакумента непасрэдна аб стварэнні фонду, завяршыць працэдуру рэгістрацыі. Рэсурсы ёсць як у расіян, так і ў нас. Да канца года ставім сабе задачу прафінансаваць няхай няшмат, але хаця б адзін-два праекты", - сказаў Аляксандр Шумілін. Размова ідзе аб зусім розных сферах: пачынаючы ад біятэхналогій і заканчваючы ІТ.
Старшыня ДКНТ адзначыў, што сама схема існавання венчурнага фонду інавацыйная для айчыннага бізнесу. Размова ідзе не аб арганізацыі ў класічным разуменні, а аб дагаворы паміж фінансавымі структурамі, у дадзеным выпадку паміж Белінфондам і Расійскай венчурная кампаніяй. Фінансаванне будзе ажыццяўляцца толькі пры з'яўленні канкрэтных праектаў.
Што датычыцца новай праграмы інавацыйнага развіцця да 2020 года, яна ўзгоднена з усімі зацікаўленымі і праходзіць экспертызу ў Адміністрацыі Прэзідэнта. Праграма ўключае 72 праекты, разлічаныя на бліжэйшую пяцігодку. У адрозненне ад папярэдніх гэта праграма будзе адкрытай: па меры з'яўлення новых праектаў урад будзе мець права ўключаць іх у праграму. У новай праграме вялікая ўвага ўдзелена маладзёжнай ініцыятыве, магчымасці рэалізацыі інавацыйных праектаў і падтрымцы моладзі. У прыватнасці, у сувязі з гэтым плануецца значна ўзмацніць і развіць інавацыйную інфраструктуру.
Аляксандр Шумілін таксама сказаў, што ў бліжэйшай перспектыве плануецца падпісаць пагадненне з Міністэрствам па навуцы і тэхналогіях Кітая аб узаемным фінансаванні навуковых праектаў. Гэта пагадненне дасць магчымасць напрамую кітайскаму боку выдзяляць грошы на праекты. Чакаецца, што ўжо ў бягучым годзе пасля падпісання пагаднення будуць прафінансаваны 20 праектаў.
Рэспубліканскі спартыўны фестываль для працуючай моладзі "Алімпія-2016" праходзіць 26-28 жніўня ў Валожынскім раёне пад дэвізам "Моладзь выбірае!". На тры дні палатачны гарадок на беразе маляўнічай ракі Іслач стаў маладзёжнай сталіцай для самых ініцыятыўных юнакоў і дзяўчат. Фестываль сабраў актывістаў БРСМ, якія прысвяцілі сваю працоўную дзейнасць рабоце ў органах дзяржаўнага кіравання, на прадпрыемствах і ва ўстановах.-0-
