21 ліпеня, Кіеў /Кар. БЕЛТА/. Беларусі і Украіне трэба кааперавацца для выхаду на рынкі трэціх краін. Аб гэтым заявіла намеснік міністра эканамічнага развіцця і гандлю Украіны Наталля Мікольская на беларуска-ўкраінскім бізнес-форуме, перадае карэспандэнт БЕЛТА.
"Неабходна развіваць кааперацыю для продажу прадукцыі на рынкі трэціх краін. Ва Украіны ёсць пагадненне аб зоне свабоднага гандлю з ЕС, з 1 жніўня ўступае ў сілу пагадненне аб зоне свабоднага гандлю з Канадай, якое прадугледжвае скасаванне 98 працэнтаў пошлін. Гэта дае магчымасці, якія могуць выкарыстоўваць беларускія кампаніі для таго, каб сумесна з партнёрамі вырабляць на тэрыторыі Украіны тавары для экспарту ў трэція краіны", - адзначыла Наталля Мікольская.
Пры гэтым, паводле яе слоў, і ўкраінскія прадпрыемствы павінны памятаць, што Беларусь з'яўляецца ўдзельніцай Еўразійскага эканамічнага саюза. "У Беларусі ёсць пагадненне з краінамі, з якімі Украіна цяпер не можа гандляваць у рэжыме свабоднага гандлю або з якімі ў яе ёсць іншыя пытанні. Гэта таксама магчымасць для нашых прадпрыемстваў кааперавацца з беларускімі кампаніямі, каб вырабляць тавары, з якімі можна выходзіць на рынкі трэціх краін", - сказала яна.
Наталля Мікольская падкрэсліла, што важна не канкурыраваць паміж сабой, а знаходзіць агульныя інтарэсы для ўзаемавыгаднага супрацоўніцтва.
Яшчэ адным драйверам росту эканомік дзвюх краін яна назвала гандаль паслугамі. "Менавіта ў сферы паслуг бачу яшчэ адну магчымасць для супрацоўніцтва паміж краінамі. Сферы інжынірынгу, праектавання, архітэктурных работ - гэта тыя сферы, дзе нашы кампаніі сумесна, прыцягваючы існуючыя рэсурсы, веды людзей, могуць выходзіць на рынкі трэціх краін. Цяпер задача - знайсці рынкі, куды мы можам сумесна выйсці", - адзначыла яна.-0-