2 лістапада, Ташкент /Кар. БЕЛТА/. Беларусь разлічвае на павелічэнне тавараабароту з Кыргызстанам, заявіў сёння прэм'ер-міністр Беларусі Андрэй Кабякоў на сустрэчы з прэм'ер-міністрам Кыргызстана Сапарам Ісакавым, перадае карэспандэнт БЕЛТА.
Андрэй Кабякоў прапанаваў правесці рэвізію двухбаковых дамоўленасцей для актывізацыі супрацоўніцтва. Прэм'ер-міністр адзначыў, што ў гэтым годзе тавараабарот Беларусі і Кыргызстана прыкметна вырас, што стала магчымым у тым ліку дзякуючы зладжанай рабоце ведамстваў дзвюх краін.
"Наша задача - не спыняцца на дасягнутым і рухацца далей. Патэнцыял нашага двухбаковага супрацоўніцтва намнога вышэйшы. Мы пакуль толькі набліжаемся да тых лічбаў, калі ў нас быў максімальны тавараабарот", - сказаў Андрэй Кабякоў. На яго думку, у аснове супрацоўніцтва з Кыргызстанам павінны быць не толькі гандлёвыя адносіны, але і інвестыцыйныя праекты.
Сапар Ісакаў у сваю чаргу падкрэсліў, што Кыргызстан надае вельмі вялікае значэнне адносінам з Беларуссю. Ён пагадзіўся з беларускім калегам, што існуючы тавараабарот не адпавядае магчымасцям дзвюх краін, трэба імкнуцца да больш высокіх паказчыкаў.
Кыргызстан цяпер рэалізуе праграму лічбавай трансфармацыі краіны "Таза Коом" і разлічвае на ўзаемадзеянне з Беларуссю ў гэтым плане, дадаў Сапар Ісакаў.-0-