15 мая, Мінск /Кар. БЕЛТА/. Беларусь разлічвае на далейшае эфектыўнае ўзаемадзеянне з кампаніяй Huawei. Аб гэтым заявіў прэм'ер-міністр Беларусі Андрэй Кабякоў сёння на сустрэчы са старшынёй савета дырэктараў кітайскай кампаніі Huawei Гуа Пінам, перадае карэспандэнт БЕЛТА.
Андрэй Кабякоў адзначыў, што кампанія Huawei не толькі ажыццяўляе пастаўку абсталявання ў Беларусь, але і забяспечвае ўкараненне сваіх праектаў, займаючыся ў нас навуковымі даследаваннямі і навучаннем беларускіх студэнтаў у Кітайскай Народнай Рэспубліцы.
"Спадзяёмся, што назапашаны вопыт і перспектывы супрацоўніцтва адыграюць важную ролю як у развіцці інфармацыйна-камунікацыйных тэхналогій у Беларусі, так і ва ўмацаванні дружбы паміж нашымі краінамі. Урад Беларусі разлічвае на далейшае эфектыўнае ўзаемадзеянне і прафесіянальнае супрацоўніцтва", - сказаў прэм'ер-міністр.
Ён падкрэсліў, што ў Беларусі ўзяты курс на пабудову IT-краіны і новы ўзровень развіцця праз лічбавую трансфармацыю эканомікі. Змяненні з выкарыстаннем сучасных тэхналогій павінны адбыцца ва ўсіх сферах эканамічнай дзейнасці і на ўсіх узроўнях дзяржаўнага кіравання. "Гэта працаёмкая і амбіцыйная задача. Свой уклад у рэалізацыю нашых планаў можа ўнесці кампанія Huawei", - адзначыў кіраўнік беларускага ўрада.
Гуа Пін пацвердзіў, што ў сферы інфармацыйна-камунікацыйных тэхналогій у бакоў ёсць перспектывы для цеснага супрацоўніцтва.-0-