27 ліпеня, Мінск /Кар. БЕЛТА/. У Беларусі прымаюцца меры па зніжэнні ўздзеяння змяненняў клімату на розныя галіны эканомікі, паведаміў 26 ліпеня на прэс-канферэнцыі галоўны навуковы супрацоўнік аддзела міжнародных праектаў РУП "Бел НДЦ "Экалогія" Іван Наркевіч, перадае карэспандэнт БЕЛТА.
"Цяпер распрацоўваецца стратэгія нізкавугляроднага развіцця Беларусі, ужо ёсць яе праект, - адзначыў Іван Наркевіч. - Плануецца больш выкарыстоўваць аднаўляльныя крыніцы энергіі - вецер, ваду, цяпло. Будучае за імі".
Начальнік службы навукова-метадычнага забеспячэння гідраметэаралагічнага і радыяцыйна-экалагічнага маніторынгу і фондаў даных Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды Віктар Мельнік расказаў, што ў лютым 2017-га зацверджана праграма развіцця сістэмы гідраметэаралагічнай бяспекі Саюзнай дзяржавы на 2017-2021 гады, якая змяшчае раздзел аб кліматычным абслугоўванні. Ён накіраваны на распрацоўку рэкамендацый па адаптацыі да змянення клімату асноўных надвор'езалежных галін - сельскай гаспадаркі, энергетыкі, камунальнай гаспадаркі. Акрамя таго, у Беларусі зацверджаны план мерапрыемстваў па рэалізацыі Парыжскіх пагадненняў, які прадугледжвае зніжэнне выкідаў парніковых газаў у атмасферу. Рэалізуецца дзяржпраграма навуковых даследаванняў на 2016-2020 гады, у рамках якой праводзіцца вывучэнне і даецца ацэнка ўплыву ўрбанізацыі, меліярацыі на кліматычныя водныя і зямельныя рэсурсы.
Паводле ацэнак экспертаў, у Беларусі прыкладна 40 працэнтаў усіх страт ад небяспечных і неспрыяльных з'яў надвор'я нясе сельская гаспадарка. Як адзначыў галоўны навуковы супрацоўнік Інстытута прыродакарыстання НАН Уладзімір Логінаў, выкарыстанне кліматычнай інфармацыі - адзін з магчымых рэзерваў паляпшэння прадукцыйнасці ў сельгасгаліне, аднак галоўным з'яўляецца павышэнне культуры земляробства і выкарыстанне сучасных тэхналогій.-0-
