13 ліпеня, Мінск /Кар. БЕЛТА/. Беларусь і Таджыкістан да канца года могуць выпрацаваць дарожную карту па стварэнні сумесных фармацэўтычных вытворчасцей, паведаміў карэспандэнту БЕЛТА Надзвычайны і Паўнамоцны Пасол Беларусі ў Таджыкістане і па сумяшчальніцтве ў Афганістане Алег Іваноў.
Прадстаўнікі фармацэўтычнай галіны Беларусі ў гэтым годзе некалькі разоў наведвалі Таджыкістан. "Таджыкі папрасілі не проста павялічыць пастаўкі лякарстваў, а дапамагчы арганізаваць штосьці на месцы, як мінімум фасоўку. Тым больш што там захаваліся кадры. У Душанбэ яшчэ ў савецкі час было некалькі фармвытворчасцей, яны закрыты, але самі пляцоўкі захаваліся, - сказаў Алег Іваноў. - Беларускія каманды, якія прыязджалі ў Таджыкістан, наведалі некалькі такіх пляцовак, адабралі тыя, якія будуць адпавядаць строгім стандартам якасці".
Папярэдне бакі дамовіліся, якія лякарствы і ў якіх аб'ёмах плануецца вырабляць на сумесных вытворчасцях. "Я спадзяюся, што да канца гэтага года мы канчаткова вызначымся з тэхналагічным цыклам. Пакуль арыентуемся ў асноўным на рынкі бліжэйшых суседзяў. Для такіх краін, як Таджыкістан, які з'яўляецца членам СГА, пытанне сертыфікацыі даволі важнае. Я думаю, што мы завершым сертыфікацыю і зможам забяспечыць беларускімі лякарствамі ўсіх жадаючых", - дадаў пасол.
Сумесныя вытворчасці плануецца ствараць з прыцэлам на рынак Афганістана, які ў некалькі разоў больш ёмісты, чым таджыкскі.
Акрамя таго, у Таджыкістане ёсць інтарэс да вытворчасці вакцын. У прыватнасці, паступаюць прапановы да беларускага боку арганізаваць такую вытворчасць.-0-