22 мая, Мінск /Кар. БЕЛТА/. Беларусь і Самарская вобласць Расіі разлічваюць павялічыць тавараабарот больш як да $600 млн, паведаміў намеснік прэм'ер-міністра Беларусі Міхаіл Русы сёння на пасяджэнні сумеснай рабочай групы па пытаннях развіцця супрацоўніцтва паміж Беларуссю і Самарскай вобласцю, перадае карэспандэнт БЕЛТА.
"Урад Беларусі і кіраўніцтва Самарскай вобласці перакананы, што трэба аператыўна выйсці на паказчыкі 2012 года, гэта значыць на тавараабарот больш як $600 млн, - адзначыў Міхаіл Русы. - Ужо ёсць зрухі, за мінулы год тавараабарот прырос на 16 працэнтаў. Першы квартал бягучага года таксама паказвае дадатную дынаміку".
На думку віцэ-прэм'ера, Беларусі і Самарскай вобласці неабходна актыўней развіваць кааперацыйныя сувязі. "Трэба мяняць падыходы і ад прынцыпу купі-прадай перайсці да кааперацыйных сувязей. Тым больш, што ў нас ёсць перспектыўныя для гэтага галіны: нафтахімія, ракетабудаванне, касмічная галіна", - растлумачыў ён. Будзе пашырацца ўзаемадзеянне ў адукацыі, ахове здароўя, аграпрамысловым комплексе. Гэта дапаможа ўкараняць новыя тэхналогіі і ствараць рабочыя месцы.
Віцэ-губернатар Самарскай вобласці Расіі Ігар Яромін адзначыў, што Беларусь уваходзіць у пяцёрку буйнейшых знешнеэканамічных партнёраў рэгіёна і з'яўляецца стратэгічна важным партнёрам. "Прадукцыя беларускіх прадпрыемстваў запатрабавана на рынку Расійскай Федэрацыі, у тым ліку Самарскай вобласці, і размова ідзе не толькі аб кампаніях харчовай прамысловасці", - падкрэсліў ён.
У ходзе цяперашняга візіту дэлегацыі Самарскай вобласці ўжо абмяркоўвалася ўзаемадзеянне ў сферы адукацыі. "У нас ёсць магчымасць запрашаць таленавітую моладзь з Беларусі для навучання ў ВНУ Самарскай вобласці зусім бясплатна. Гэта датычыцца розных галін, у тым ліку высокатэхналагічных - касмічнай галіны, нафтахіміі, вытворчасці мінеральных угнаенняў. Мы гатовы аказваць дапамогу ў падрыхтоўцы спецыялістаў для эканомікі Беларусі", - дадаў Ігар Яромін.
У сваю чаргу Самарская вобласць зацікаўлена ў беларускім вопыце развіцця сферы ЖКГ, добраўпарадкавання гарадоў. "Мы рыхтуемся да чэмпіянату свету па футболе, і для нас вельмі важна ствараць камфортныя ўмовы для расіян і гасцей", - падкрэсліў ён.-0-
