25 жніўня, Мінск /Кар. БЕЛТА/. Беларусь увяла часовыя абмежаванні па ўвозе свініны з Чувашскай Рэспублікі Расійскай Федэрацыі з-за афрыканскай чумы свіней (АЧС), паведамілі БЕЛТА ў дэпартаменце ветэрынарнага і харчовага нагляду Мінсельгасхарча Беларусі.
Паводле інфармацыі Міжнароднага эпізаатычнага бюро, на тэрыторыі Чувашыі зарэгістраваны выпадак захворвання ўспрымальных відаў жывёл на афрыканскую чуму свіней.
У сувязі з гэтым дэпартамент ветэрынарнага і харчовага нагляду ўвёў часовыя абмежаванні на ўвоз у Беларусь з названай вобласці жывых свіней, спермы кныроў, свініны, у тым ліку ад дзікоў, і прадуктаў перапрацоўкі, скураной, рогакапытнай і кішачнай сыравіны, шчаціння, паляўнічых трафеяў, атрыманых ад успрымальных відаў жывёл, кармоў і кармавых дабавак для жывёл жывёльнага паходжання, у тым ліку з птушкі і рыбы, кармавых дабавак для катоў і сабак, былога вы ўжытку абсталявання для ўтрымання, забою і разбірання свіней.
Названыя абмежаванні таксама распаўсюджваюцца на гатовыя кармы для катоў і сабак, што не прайшлі тэрмічную апрацоўку (тэмпература не ніжэйшая за плюс 70 градусаў, час апрацоўкі не меншы за 20 мінут), вырабленыя з сыравіны, што паходзіць з Чувашыі.
"Адначасова неабходна прыняць дадатковыя меры кантролю па забеспячэнні біялагічнай аховы буйных свінагадоўчых комплексаў, свінагадоўчых ферм і гаспадарак усіх форм уласнасці", - адзначылі ў дэпартаменце. Акрамя таго, адмяняюцца ўсе выдадзеныя раней дазволы на ўвоз названых тавараў з Чувашскай Рэспублікі.
Афрыканская чума свіней (хвароба Мантгомеры) - кантагіёзнае віруснае захворванне свойскіх свіней і дзікоў. Захворванне перадаецца пры непасрэдным кантакце здаровых і хворых жывёл, праз прадукты са свініны, кляшчамі і механічна (транспартнымі сродкамі, пры перамяшчэнні жывёл). Вакцыны няма. Амаль усё пагалоўе хворых свіней памірае. Жывёлы з падазрэннем на захворванне знішчаюцца. Для чалавека АЧС бяспечная.-0-
