27 мая, Мінск /Юлія Огнева - БЕЛТА/. Беларусь бачыць вялікія перспектывы для развіцця інвестыцыйнага супрацоўніцтва з Аманам, заявіў сёння прэм'ер-міністр Беларусі Андрэй Кабякоў на сустрэчы са старшынёй ГПП Амана Саідам Аль-Кіюмі, перадае карэспандэнт БЕЛТА.
"Мы вельмі зацікаўлены ў прыходзе аманскага бізнесу ў Беларусь і бачым вялікія перспектывы для развіцця інвестыцыйнага супрацоўніцтва паміж нашымі краінамі", - адзначыў Андрэй Кабякоў.
Паводле яго слоў, Беларусь разглядае Аман у якасці аднаго з перспектыўных гандлёва-эканамічных і інвестыцыйных партнёраў на Блізкім Усходзе. "Толькі ў 2016 годзе вашу краіну наведалі міністры гандлю і адукацыі, намеснік старшыні Савета Рэспублікі Нацыянальнага сходу. Гэта вельмі добрая дынаміка і яркі паказчык узаемнага жадання нашых краін развіваць існуючыя адносіны дружбы і даверу, умацоўваць іх ва ўсіх сферах дзейнасці", - лічыць прэм'ер-міністр. На думку Андрэя Кабякова, сённяшняя сустрэча з'яўляецца яшчэ адным пацвярджэннем шчырага намеру Беларусі і Амана да актывізацыі супрацоўніцтва.
"Прыярытэтную ўвагу мы ўдзяляем узаемадзеянню ў гандлёва-эканамічнай сферы, адным з галоўных складнікаў гандлёва-эканамічнага супрацоўніцтва з'яўляюцца кантакты прадстаўнікоў дзелавых колаў. Упэўнены, што эфектыўнасць і рэзультатыўнасць кантактаў бізнес-супольнасці з'яўляецца залогам паспяховага развіцця міждзяржаўных адносін у гандлёва-эканамічнай галіне ў цэлым", - сказаў Андрэй Кабякоў.
Ён канстатаваў, што ў бягучым годзе адзначана дадатная дынаміка ў развіцці гандлёва-эканамічных адносін Беларусі і Амана. "Разам з тым паказчыкі тавараабароту з'яўляюцца вельмі нізкімі. Патэнцыял Беларусі і Амана ў галіне гандлёва-эканамічнага ўзаемадзеяння рэалізуецца далёка не ў поўнай меры", - падкрэсліў прэм'ер-міністр.
Андрэй Кабякоў запэўніў, што Беларусь гатова развіваць супрацоўніцтва з Аманам па шэрагу напрамкаў. "Мы гатовы пастаўляць кар'ерную і шахтавую тэхніку БелАЗ, дарожна-будаўнічую і камунальную тэхніку "Амкадор", аўтамабілі і аўтобусы МАЗ, разнастайную сельскагаспадарчую тэхніку. Гэта беларуская прадукцыя ўжо вядома на аманскім рынку", - адзначыў ён.
Любы праект, які зацікавіць аманскі бок, будзе разглядацца праз прызму асаблівых адносін паміж краінамі ў духу ўзаемавыгаднага партнёрства, дружбы і даверу. "Упэўнены, што, нягледзячы на крызісныя з'явы ў сусветнай эканоміцы, аб'яднаўшы нашы намаганні, мы дасягнём жаданага выніку. Для гэтага ёсць усе неабходныя ўмовы і, галоўнае, добрая воля, - сказаў Андрэй Кабякоў. - Спадзяюся, што наша сустрэча, вашы перагаворы ў Міністэрстве замежных спраў, Міністэрстве гандлю, а таксама з патэнцыяльнымі беларускімі партнёрамі дадуць магчымасць выпрацаваць канкрэтны план далейшага ўзаемадзеяння паміж дзелавымі коламі Беларусі і Амана, што будзе садзейнічаць актывізацыі беларуска-аманскага супрацоўніцтва".
У сваю чаргу Саід Аль-Кіюмі выказаў удзячнасць Андрэю Кабякову за магчымасць правесці сустрэчу і выказаў надзею на далейшае плённае супрацоўніцтва.-0-
