16 лютага, Мінск /Кар. БЕЛТА/. Беларусь адмовілася ад імпартнай сыравіны для вытворчасці цукру, паведаміла ў інтэрв'ю БЕЛТА намеснік старшыні канцэрна "Белдзяржхарчпрам" Марына Міхальцэвіч.
"У 2018 годзе цукар-сырэц увозіцца ў Беларусь не будзе, прынята канчатковае рашэнне. Сёння бураковага цукру дастаткова не толькі для поўнага забеспячэння ўнутранага рынку да ўраджаю буракоў 2018 года, але і для паставак на экспарт", - сказала Марына Міхальцэвіч.
Яна адзначыла, што Слуцкі цукрова-рафінадны камбінат дзякуючы мадэрнізацыі вытворчасці можа перапрацоўваць цукровыя буракі не толькі ў цукар, але і ў сіроп. Гэта дасць магчымасць вырабляць прадукт цалкам на айчыннай сыравіне. "Такой мадэрнізацыі на іншых заводах няма. Для цукровай галіны характэрна сезоннасць работы. Вытворчасць цукру з буракоў ураджаю 2017 года завершана. Заводы перапрацавалі ўжо буракі, і да новага ўраджаю будуць весціся іншыя работы. Напрыклад, у Гарадзейскага цукровага камбіната, які выпускае канфіцюры, сокі, ёсць яшчэ і сады, вырошчваюцца клубніцы, якія ідуць ва ўласную вытворчасць", - расказала намеснік старшыні канцэрна.
Як паведамлялася, у 2017 годзе на тэрыторыі Слуцкага цукрова-рафінаднага камбіната была пабудавана ёмістасць вышынёй 38 м і 35 м у дыяметры. Яе запоўнілі 40 тыс. т цукровага сіропу, які будзе вясной загружаць магутнасці камбіната. З яго плануецца вырабіць больш за 20 тыс. т цукру. Раней для работы ў міжсезонні прадпрыемства закупляла цукар-сырэц з Лацінскай Амерыкі.-0-
