30 ліпеня, Мінск /Кар. БЕЛТА/. Банкі ў Беларусі не змогуць у аднабаковым парадку павялічваць працэнты па крэдытах. Гэта прадугледжана законам "Аб унясенні змяненняў і дапаўненняў у Банкаўскі кодэкс", які афіцыйна апублікаваны на Нацыянальным прававым інтэрнэт-партале, паведамляе БЕЛТА.
У законе прапісаны парадак устанаўлення памеру працэнтаў за карыстанне крэдытам і падыходаў да налічэння. Замацоўваюцца два падыходы да вызначэння памеру за карыстанне крэдытам: у абсалютным лікавым выражэнні (фіксаваная гадавая працэнтная стаўка) і зыходзячы з разліковай велічыні, прывязанай да базавага паказчыка (пераменная гадавая працэнтная стаўка). "Крэдытадавец не мае права ў аднабаковым парадку павялічыць памер працэнтаў за карыстанне крэдытам", - сказана наконт гэтага ў законе.
Акрамя таго, беларусы атрымалі магчымасць датэрмінова пагашаць спажывецкія крэдыты без паведамлення банку. "Крэдытаатрымальнік - фізічная асоба мае права датэрмінова вярнуць (пагасіць) цалкам або часткова крэдыт на спажывецкія патрэбы з выплатай працэнтаў за тэрмін карыстання крэдытам без папярэдняга паведамлення крэдытадаўцу", - падкрэсліваецца ў абноўленым Банкаўскім кодэксе. Пры гэтым спагнанне няўстойкі, штрафу, пені і іншых штрафных санкцый за датэрміновае вяртанне не дапускаецца.
Кодэкс дапоўніўся асобным артыкулам, у якім агавораны асаблівасці крэдытавання фізічных асоб. Так, прадугледжана магчымасць прадастаўлення крэдыту толькі ў беларускіх рублях. Устаноўлены патрабаванні, якія павінны выконвацца пры заключэнні крэдытнага дагавора. У прыватнасці, кліент не можа быць абмежаваны ў выбары страхавой арганізацыі або выканаўцы ацэнкі аб'ектаў грамадзянскіх правоў. Банкі абавязалі бясплатна прадастаўляць пісьмовую інфармацыю аб кошце дадатковых платных паслуг. З фізічных асоб не павінна спаганяцца плата за інфармацыю аб умовах крэдытавання і разгляд заявы аб прадастаўленні крэдыту і іншых дакументаў, неабходных для гэтага, за адкрыццё бягучага банкаўскага рахунку і залічэнне на яго сум крэдыту, калі ўмовамі крэдытнага дагавора прадугледжана адкрыццё рахунку. Больш таго, як мінімум адзін з варыянтаў вяртання фізічнай асобай крэдыту з усіх прадугледжаных у крэдытным дагаворы павінен быць бясплатным. Калі чалавек адмаўляецца ад дадатковых платных паслуг, якія яму прапануюцца пры заключэнні дагавора, яму павінен быць прапанаваны альтэрнатыўны варыянт прадастаўлення крэдыту, супастаўны па сумах і тэрмінах, але ўжо без іх.
У абноўленым заканадаўстве таксама замацаваны асобныя практычныя аспекты ўзаемадзеяння банкаў, Нацыянальнага банка і дзяржаўных органаў у частцы атрымання і прадастаўлення звестак, што з'яўляюцца банкаўскай тайнай, удасканальваецца дзейнасць нябанкаўскіх крэдытна-фінансавых арганізацый.
Палажэнні, якія датычацца крэдытавання фізасоб, уступаюць у сілу пасля афіцыйнага апублікавання закона, якое адбылося 28 ліпеня.-0-
