29 ліпеня, Мінск /Кар. БЕЛТА/. ААТ "Банк развіцця Рэспублікі Беларусь" плануе ў 2016-2020 гадах прыцягнуць у эканоміку каля 1,2 млрд еўра знешніх рэсурсаў, паведамілі БЕЛТА ў прэс-службе банка па выніках пасяджэння наглядальнага савета банка пад старшынствам прэм'ер-міністра Беларусі Андрэя Кабякова.
На пасяджэнні абмеркаваны вынікі выканання Банкам развіцця стратэгіі да 2015 года, а таксама разгледжаны і зацверджаны стратэгічны план развіцця банка на 2016-2020 гады. "У частцы акумуліравання рэсурсаў на знешнім рынку Банк развіцця ставіць сабе задачу прыцягваць замежныя рэсурсы па самаму нізкаму кошту, даступнаму на адкрытым рынку для Беларусі. У цэлым на валавой аснове плануецца за 5 гадоў прыцягнуць у эканоміку краіны каля 1,2 млрд еўра знешніх рэсурсаў", - растлумачылі ў банку.
У стратэгіі да 2020 года захоўваецца мэтавая накіраванасць банка як нацыянальнага фінансавага інстытута развіцця. Праз Банк развіцця будуць крэдытавацца ўсе новыя інвестпраекты па дзяржаўных праграмах. Пры гэтым асноўным інструментам стане конкурсны адбор праектаў. Паступова роля банка як аператара дырэктыўных крэдытаў будзе скарачацца, у сваю чаргу будзе пашырацца яго дзейнасць як інстытута развіцця. Рост аб'ёму партфеля інвестыцыйных крэдытаў за пяць гадоў складзе да канца 2019 года 1,76 раза.
Акрамя гэтага на базе Банка развіцця запланавана стварыць інстытуцыянальную структуру па правядзенні адзінай дзяржаўнай палітыкі ў галіне падтрымкі экспарту.
Замацуецца як стратэгічны для Банка развіцця напрамак падтрымкі малога і сярэдняга прадпрымальніцтва (МСП). Плануецца развіваць яго на сістэмнай аснове, што ўключае як фінансавую, так і нефінансавую падтрымку. У частцы фінансавай падтрымкі банк прадоўжыць развіццё прадуктовай лінейкі ўжо рэалізуемай праграмы. З канца 2016 года будзе арганізавана дадатковая лінія падтрымкі МСП за кошт рэсурсаў Сусветнага банка. Таксама валютныя рэсурсы будуць прапанаваны за кошт лініі Дзяржбанка развіцця Кітая. У сярэднетэрміновым перыядзе банк прапрацуе гарантыйны механізм для МСП.
"Акрамя таго, банк прадоўжыць выконваць функцыі кіраўніка сродкамі сямейнага капіталу і актывамі прадпрыемстваў дрэваапрацоўкі. Для дасягнення ўсяго прадугледжанага ў стратэгіі неабходна ўдакладненне мандата Банка развіцця, якое будзе ажыццёўлена да канца бягучага года", - падкрэслілі ў прэс-службе.
У ходзе справаздачы аб выніках рэалізацыі стратэгіі да 2015 года было адзначана, што Банк развіцця забяспечыў выкананне ўсіх мэтавых паказчыкаў. Аб'ём крэдытнага партфеля перасягнуў Br32,5 трлн (недэнамінаваныя рублі) пры планавым паказчыку Br30 трлн. Аб'ём пазык на міжнародным рынку капіталу за час рэалізацыі стратэгіі перасягнуў $800 млн пры заданні $500 млн. Доля праблемнай запазычанасці ў крэдытным партфелі склалася на ўзроўні 5,4 працэнта пры ліміце не больш за 7 працэнтаў. Выкананне паказчыкаў прыбытковасці і ўзважаная палітыка ў галіне актыўных аперацый далі магчымасць дасягнуць паказчыка дастатковасці нарматыўнага капіталу на ўзроўні больш за 35 працэнтаў пры плане не менш як 20 працэнтаў.
ААТ "Банк развіцця Рэспублікі Беларусь" - спецыялізаваны фінансавы інстытут, утвораны ў 2011 годзе. Яго заснавальнікамі з'яўляюцца Савет Міністраў і Нацыянальны банк Беларусі. Кантрольны пакет акцый банка належыць дзяржаве. У ліку асноўных задач БРРБ - фінансаванне доўгатэрміновых і капіталаёмістых інвестыцыйных праектаў пры рэалізацыі дзяржпраграмы і мерапрыемстваў.-0-
