9 ліпеня, Мінск /Кар. БЕЛТА/. Аб'ём біржавых здзелак, праведзеных у ААТ "Беларуская ўніверсальная таварная біржа" (БУТБ), у першым паўгоддзі бягучага года дасягнуў Br1,9 млрд, што на 28 працэнтаў больш, чым за аналагічны перыяд 2017-га, паведамілі БЕЛТА ў прэс-службе БУТБ.
Больш за трэць біржавога тавараабароту прыпала на секцыю металапрадукцыі, дзе сума здзелак з пачатку года склала Br712 млн, павялічыўшыся на 30 працэнтаў. Дадатная дынаміка забяспечана галоўным чынам за кошт рэалізацыі на ўнутраным рынку 205 тыс. т чорных металаў і вырабаў з іх на Br534 млн. У выніку ў натуральным выражэнні продаж гэтай прадукцыі прырос на 11 працэнтаў, а ў вартасным - на 33 працэнты. Дзякуючы актыўнаму ўдзелу ў біржавых таргах айчынных цэментных заводаў высокія тэмпы росту прадэманстраваў вугаль, сума здзелак з якім павялічылася на 47 працэнтаў да Br69 млн. Упэўнены рост быў характэрны і для іншых запатрабаваных груп тавараў: каляровых металаў і вырабаў з іх, электратэхнічнай прадукцыі, а таксама лому і адходаў чорных і каляровых металаў.
Тавараабарот па секцыі лесапрадукцыі па выніках паўгоддзя вырас на 32 працэнты, спыніўшыся на адзнацы Br664 млн. Асноўнымі драйверамі росту сталі пастаўкі круглых лесаматэрыялаў для патрэб айчыннай дрэваапрацоўчай галіны, якія павялічыліся на 33 працэнты да Br268 млн, і экспартныя продажы піламатэрыялаў, якія дасягнулі Br260 млн, што на 78 працэнтаў больш, чым у першым паўгоддзі 2017 года. Акрамя таго, дадатная дынаміка зафіксавана і па такіх папулярных на ўнутраным рынку пазіцыях, як папяровая прадукцыя і паліўныя шчэпкі. У першым выпадку біржавыя продажы выраслі на 24 працэнты да Br17 млн, а ў другім - у 2,5 раза да Br1,3 млн. Дынамічна развіваўся і гандаль паслугамі па нарыхтоўцы драўніны. Так, сума здзелак, праведзеных лясгасамі, склала Br45 млн, або плюс 95 працэнтаў да аналагічнага перыяду мінулага года. Што датычыцца экспарту лесапрадукцыі, то нараўне з піламатэрыяламі павышаным попытам у замежных пакупнікоў карысталіся паліўныя шчэпкі, паліўныя брыкеты і гранулы.
Секцыя сельгаспрадукцыі забяспечыла Br316 млн біржавога тавараабароту, перасягнуўшы паказчык мінулага года на 6 працэнтаў. Пры гэтым крыху менш як палавіна ад названай сумы - Br140 млн - прыпала на здзелкі па закупцы шроту і макухі алейных культур на ўнутраным рынку. Рост у параўнанні з першым паўгоддзем 2017 года склаў 22 працэнты. Акрамя таго дадатны трэнд намеціўся і па некаторых іншых таварах, што рэалізуюцца ўнутры краіны. Напрыклад, продажы збожжавых і кармавых дабавак выраслі на 14 працэнтаў, пастаўкі мяса - у 3 разы, сметанковага масла - на 21 працэнт. Разам з тым з-за нізкага ўзроўню попыту на алеі да Br12 млн (на 62 працэнты) знізілася рэалізацыя гэтай прадукцыі ў адрас айчынных спажыўцоў. Продаж сыроў сычужных скараціўся на 53 працэнты да Br4 млн.
Няпростая сітуацыя склалася і з экспартам сельгаспрадукцыі праз біржу. Галоўная прычына - праблемы з доступам беларускіх малакаперапрацоўчых прадпрыемстваў на стратэгічны рынак Расіі, адзначылі ў БУТБ. У выніку продаж сметанковага масла не змог пераадолець рубеж Br19 млн, што менш за паказчык мінулага года на 39 працэнтаў, а аб'ём экспартных здзелак з сухім малаком склаў Br6,6 млн, або мінус 66 працэнтаў да аналагічнага перыяду 2017 года. Нягледзячы на названыя вышэй стрымальныя фактары, пэўныя таварныя пазіцыі ўсё ж выйшлі ў плюс па выніках першага паўгоддзя, звярнулі ўвагу ў БУТБ. Напрыклад, у 8,5 раза вырас экспарт сычужных сыроў, перавысіўшы Br18 млн, мяса рэалізавана амаль на Br10 млн (рост у 2 разы), прадукцыі перапрацоўкі алейных культур - на Br5,5 млн (сямікратны рост), збожжа - на Br3,7 млн (у 11 разоў больш, чым за першае паўгоддзе 2017-га).
Па стане на 1 ліпеня на БУТБ акрэдытаваны 19 524 кампаніі, уключаючы 3 960 нерэзідэнтаў з 60 краін (у чэрвені геаграфія біржавога гандлю пашырылася за кошт кампаніі з Рэспублікі Кот-д'Івуар).-0-
