18 красавіка, Мінск /Кар. БЕЛТА/. Выстава пад адкрытым небам беларускага сюррэаліста Георгія Скрыпнічэнкі адкрыецца ў Мінску 17 мая, паведамілі карэспандэнту БЕЛТА арганізатары.
Экспазіцыя праекта "Мастак і горад" традыцыйна будзе дэманстравацца на плошчы Якуба Коласа. На святочным адкрыцці сталічная плошча пагрузіцца ў дзіўную атмасферу сюррэалізму. Выступленне вулічных акцёраў, унікальная абстаноўка і сюрпрызы чакаюць наведвальнікаў у гэты дзень.
Георгій Скрыпнічэнка - беларускі мастак, які стаяў ля вытокаў айчыннага сюррэалізму. Яго работы вызначае асаблівая манера выканання на мяжы фантазіі і рэчаіснасці, невыпадкова Георгія Скрыпнічэнку часта называюць беларускім Сальвадорам Далі. У сваіх карцінах мастак выкарыстоўваў вопыт вялікіх папярэднікаў, адмаўляючыся пры гэтым ад залішняй эпатажнасці. Майстар пісаў свае сюррэалістычная сюжэты, абапіраючыся на беларускую міфалогію і гістарычны кантэкст. Ён ніколі не трактаваў свае творы. Як расказваў сам аўтар, для яго было важна, каб карціны, поўныя метафар і алегорый, заставаліся для гледача фантастычным рэбусам.
Выставачны праект "Мастак і горад" рэалізуецца на працягу 7 гадоў. Паводле слоў загадчыка аддзела рэкламы і спецыяльных праектаў Нацыянальнага цэнтра сучасных мастацтваў Беларусі Захара Дудзінскага, задача праекта праз знаёмства з выдатнымі сучаснымі беларускімі мастакамі дарыць гараджанам свята і крыху здзіўляць. Менавіта таму ў гэтым годзе выбрана такая яркая асоба, як Георгій Скрыпнічэнка. Маштабная выстава на працягу больш як пяць месяцаў будзе прадстаўлена ўвазе мінчан і гасцей сталіцы, а з 20 верасня пераедзе ў Віцебск.
Традыцыйна рэпрадукцыі будуць суправаджацца тэкставым апісаннем на трох мовах - беларускай, рускай і англійскай. Уся дадатковая інфармацыя аб праекце размешчана на сайце higminsk.by, дзе будуць выстаўлены карціны мастака, прадстаўленыя ў экспазіцыі, з магчымасцю скачвання ў якасці рабочага стала на камп'ютар або мабільнае ўстройства.
Пяты год запар генеральным партнёрам экспазіцыі выступіць банк ВТБ. Праект рэалізуе камунікацыйная кампанія GBS сумесна з Нацыянальным цэнтрам сучасных мастацтваў пры падтрымцы Міністэрства культуры і Мінскага гарадскога выканаўчага камітэта.-0-
