18 кастрычніка, Мінск /Кар. БЕЛТА/. Выстаўка "Ленін'17" да 100-годдзя Вялікай Кастрычніцкай сацыялістычнай рэвалюцыі адкрыецца 25 кастрычніка ў Нацыянальным мастацкім музеі Беларусі, паведамілі БЕЛТА ў музеі.
Экспазіцыя будзе ўключаць 12 маляўнічых палотнаў, 7 скульптурных работ і 2 прадметы дэкаратыўна-прыкладнога мастацтва беларускіх і рускіх мастакоў, аб'яднаных тэмай Ленініяны.
Выстаўка прадэманструе манументальныя, шматфігурныя палотны з запаснікаў музея, звязаныя з галоўным рэвалюцыянерам ХХ стагоддзя. Наведвальнікі ўбачаць шырокую і разнастайную іканаграфію правадыра "сусветнага пралетарыяту": Леніна на чале рэвалюцыйнага атрада рабочых і сялян і з жонкай Надзеяй Крупскай, Леніна-прамоўцу, які выступае на з'ездзе, і Леніна-мысліцеля.
Ніякі іншы вобраз не займаў у савецкім і сусветным мастацтве такога значнага месца, як вобраз Уладзіміра Леніна. Помнікі правадыру Кастрычніцкай рэвалюцыі ўзводзіліся на плошчах, у парках і скверах вялікіх і маленькіх гарадоў СССР і краін сацыялістычнага лагера. Партрэты і жанравыя сцэны з выявай Леніна год за годам папаўнялі калекцыі музеяў. Выяўленчая Ленініяна стала яркім прыкладам створанага міфа ў мастацтве.
Пра тое, як ствараўся ленінскі выяўленчы міф у беларускім мастацтве, раскажуць палотны Анатоля Шыбнёва, Валянціна Волкава, Уладзіміра Стальмашонка, Адольфа Гугеля і іншых. Ніхто з прадстаўленых на выстаўцы мастакоў не маляваў Леніна з натуры.
Сёння, калі дым легенд развеяны, калі многія помнікі правадыру зведалі вандалізм і былі знесены, калі з постмадэрнісцкай іроніяй сучасныя мастакі пераасэнсоўваюць сачыненні савецкай эпохі, ёсць магчымасць паглядзець на гэтыя творы іншымі вачамі, сфарміраваць сваё ўяўленне аб гэтым мастацтве.
Выстаўка ў НММ прадоўжыцца да 12 снежня.-0-
