21 чэрвеня, Віцебск /Кацярына Князева - БЕЛТА/. Адзін з самых экстраардынарных беларускіх мастакоў, прадстаўнік канцэптуальнага мастацтва Руслан Вашкевіч здыме ў Віцебску версію футурыстычнай оперы "Перамога над Сонцам". Аб гэтым ён паведаміў сёння на прэс-канферэнцыі, прысвечанай святкаванням Дня горада, перадае карэспандэнт БЕЛТА.
"Гэта будзе інтэракцыя - наша версія футурыстычнай оперы "Перамога над Сонцам". У гэтай версіі невыпадкова ўсё - і час, і месца, і людзі. Замест змены дэкарацый у нас будзе змена самага доўгага дня на самую кароткую ноч у годзе - з 21 на 22 чэрвеня. Асноўнымі ўдзельнікамі-акцёрамі стануць інваліды па зроку, з якімі ў мяне ўжо ёсць вопыт работы. Гэта людзі, якія не іграюць супрэматызм, а жывуць у тым свеце, які імкнуліся паказаць супрэматысты", - растлумачыў Руслан Вашкевіч.
Закрытае дзейства будзе здымацца на відэа і пазней будзе пакладзена ў аснову работы, якую Руслан Вашкевіч мае намер прэзентаваць на 57-й Венецыянскім біенале сучаснага мастацтва, якое пройдзе з 13 мая па 26 лістапада 2017 года. "Хутчэй за ўсё, наступнае Венецыянскае біенале будзе звязана са стагоддзем сацыялістычнай рэвалюцыі. Амаль няма сумненняў у гэтым, таму што гэтыя ідэі, крытыка капіталізму апошнім часам памацнелі, усе зачытваюцца Карлам Марксам - гэта нават стала модай. А праект на біенале заўсёды павінен адпавядаць ідэі куратара. Таму мы трапляем у цэль з футурыстычнай операй. Паспрабуем падаць наш праект, усё залежыць ад таго, што атрымаецца на выхадзе - відэадакументацыя або іншая форма", - дадаў Руслан Вашкевіч.
У камандзе аўтараў - выканаўцаў гэтага акта сучаснага мастацтва, як называе яго рэжысёр, прадстаўнікі таварыстваў інвалідаў па зроку з Мінска і Магілёва, сталічны культуролаг Максім Жбанкоў, музыкант Сяргей Пукст, віцебскі культуролаг і мастацтвазнавец Таццяна Катовіч і іншыя.
Акрамя таго, знятае відэа з аблегчанай версіяй самой інтэракцыі будзе прадэманстравана 24 чэрвеня на свяце адкрыцця мемарыяльнай дошкі і вуліцы Марка Шагала ў праграме святкавання Дня горада Віцебска.
"Перамога над Сонцам" (1913) - футурыстычная опера кампазітара Міхаіла Мацюшына і паэта Аляксея Кручоных, цалкам пабудаваная на літаратурнай, музычнай і жывапіснай алагічнасці. Ідэя яе стварэння з'явілася на Першым усерасійскім з'ездзе футурыстаў з удзелам усяго трох чалавек - ужо згаданых аўтараў і мастака Казіміра Малевіча.-0-
