20 верасня, Мінск /Кар. БЕЛТА/. Расія вылучыла на амерыканскую кінапрэмію "Оскар" драму Андрэя Канчалоўскага "Рай". Гэта стала вядома 19 верасня па выніках пасяджэння Расійскага оскараўскага камітэта, паведамляюць інфармацыйныя агенцтвы.
Стужка прэзентавана ў верасні на 73-м Венецыянскім кінафестывалі, дзе Андрэй Канчалоўскі быў удастоены "Сярэбранага льва" за лепшую рэжысуру.
Дзеянне фільма разгортваецца ў нямецкім канцэнтрацыйным лагеры. Карціна расказвае аб перапляценні лёсаў трох герояў у гады Вялікай Айчыннай вайны. У фільме зняліся жонка Канчалоўскага Юлія Высоцкая (у ролі рускай эмігранткі, арыстакраткі, удзельніцы французскага Супраціўлення), Філіп Дзюкен, Крысціян Клаус, Віктар Сухарукаў, Петэр Курт і іншыя.
Цырымонія ўручэння кінапрэміі "Оскар" адбудзецца ў сакавіку 2017 года. Карціна "Рай" будзе прадстаўлена ў катэгорыі "Лепшы замежны фільм".-0-