16 кастрычніка, Мінск /Кар. БЕЛТА/. Праблемы беларускага тэатра абмяркуюць на VII Міжнародным форуме тэатральнага мастацтва "ТЭАРТ", паведамілі карэспандэнту БЕЛТА арганізатары.
Круглы стол "Што не так з беларускім тэатрам?" стане завяршальным мерапрыемствам міжнароднага форуму.
Абмеркаванне з тэатральным крытыкам Людмілай Грамыка прызначана закрануць актуальныя пытанні тэатральнага працэсу Беларусі: якое месца ў грамадскай свядомасці сёння займае тэатр, што чакаюць ад спектакляў гледачы, якое значэнне асобы ў тэатральным працэсе, што сцэнічнае мастацтва развівае, а што разбурае, ці трэба кантраляваць мастака і інш.
Пасля круглага стала адбудзецца прэзентацыя кнігі Андрэя Масквіна "Беларуская драматургія: погляд з Польшчы". У чым феномен сучаснай беларускай драматургіі, як яе бачаць іншыя, чаму яна патрабуе ўвагі - гэтыя пытанні будуць закрануты ў час прэзентацыі зборнікаў п'ес Паўла Пражко і Дзмітрыя Багаслаўскага, выдадзеных у Польшчы.
Спектаклем закрыцця VII Міжнароднага форуму тэатральнага мастацтва "ТЭАРТ" стане "горкая" камедыя без слоў "Пансіён Belvedere". Гэты спектакль з лірычнымі роздумамі аб скарацечнасці жыцця, пастаўлены італьянскім акцёрам і рэжысёрам Матэа Сп'яцы, гледачы ўбачаць сёння ўвечары на сцэне Беларускага дзяржаўнага тэатра лялек.
У гэтым годзе "ТЭАРТ" паказаў 19 пастановак разнастайных жанраў і форм з васьмі краін свету: Беларусі, Латвіі, Францыі, Германіі, Італіі, Расіі, Славеніі і Кыргызстана. Фестываль складаўся з трох секцый: міжнароднай праграмы, праграмы Belarus Open і "Школы "ТЭАРТа", якая ўключала лекцыі, сустрэчы з рэжысёрамі, майстар-класы і іншыя адукацыйныя мерапрыемствы.
VII Міжнародны форум тэатральнага мастацтва "ТЭАРТ" прайшоў з 27 верасня па 16 кастрычніка ў Мінску.
Арганізатары Міжнароднага форуму тэатральнага мастацтва "ТЭАРТ" - Цэнтр візуальных і выканальніцкіх мастацтваў "АРТ Карпарэйшн" і ААТ "Белгазпрамбанк", генеральны партнёр - ААТ "Газпрам трансгаз Беларусь". Форум праходзіць пры падтрымцы Міністэрства культуры Беларусі і Мінгарвыканкама.-0-
