19 верасня, Мінск /Кар. БЕЛТА/. Праект "Беларусьфільм-95", прысвечаны 95-годдзю кінастудыі, стартуе сёння ў мінскім кінатэатры "Піянер", паведамілі БЕЛТА ва УП "Кінавідэапракат" Мінгарвыканкама.
Гледачам прапануюць паглядзець ігравое, анімацыйнае і неігравое кіно беларускай вытворчасці. Фільмы ігравога фармату будуць паказваць кожную трэцюю сераду, анімацыйныя стужкі - кожную нядзелю, дакументальныя карціны - двойчы ў месяц, у другую і чацвёртую сераду.
Адкрые серыю кінасеансаў карціна Валерыя Рубінчыка "Дзікае паляванне караля Стаха", затым 23 верасня мінчане ўбачаць мультфільм "Прыгоды Несцеркі", 26 верасня - кароткаметражкі "Мы жывем на краі", "Кола", "Драўляны народ", "Янка Купала" праекта "Час летапісу".
З залатой калекцыі кінастудыі прадставяць мастацкія фільмы "Альпійская балада" і "Ідзі і глядзі". Пра іх раскажуць самі ўдзельнікі творчай групы. Як раней адзначаў генеральны дырэктар "Беларусьфільма" Уладзімір Карачэўскі, праграма паказаў распісана да снежня 2019 года.-0-
