3 кастрычніка, Мінск /Кар. БЕЛТА/. Продаж білетаў на Міжнародны дзіцячы конкурс песні "Еўрабачанне-2018", які прымае Мінск, пачаўся 2 кастрычніка. Аб гэтым карэспандэнту БЕЛТА паведамілі ў Белтэлерадыёкампаніі.
Білеты будуць рэалізоўвацца як на сам фінал конкурсу 25 лістапада, так і на генеральную рэпетыцыю 24 лістапада. Іх можна набыць анлайн на сайтах bycard.by, afisha.tut.by, afisha.relax.by, з дапамогай мабільных дадаткаў пад Android і iOS на play.google.com і itunes.apple.com, а таксама на афіцыйным сайце Белтэлерадыёкампаніі www.tvr.by. Больш за 100 кас па ўсёй краіне будуць рэалізоўваць білеты ў салонах сувязі Life і "Ало", магазінах "Электрасіла" і турыстычных кампаніях "Бі-тур", "Тур-Атэлье", "Топ-тур", "Турбери".
Генеральная рэпетыцыя пройдзе ў фармаце гала-канцэрта, аналагічным галоўнаму шоу. Менавіта ў час гэтай рэпетыцыі журы ацэньвае канкурсантаў, а атрыманыя рэзультаты будуць аб'яўлены ў прамым эфіры ў час фіналу. Кошт білетаў на генеральную рэпетыцыю конкурсу ад Br6 да Br9, а на сам конкурс - ад Br9 да Br12.
Шоу дзіцячага "Еўрабачання-2018" адбудзецца ў спартыўна-забаўляльным комплексе "Мінск-Арэна". Музычны форум у гэтым годзе збярэ рэкордную колькасць удзельнікаў - 20 краін.
Арганізатарам і каардынатарам усіх мерапрыемстваў дзіцячага "Еўрабачання-2018" выступае Нацыянальная дзяржаўная тэлерадыёкампанія Рэспублікі Беларусь як адзіны ў краіне член Еўрапейскага вяшчальнага саюза.-0-
