26 жніўня, Мінск /Вікторыя Апанасёнак - БЕЛТА/. Нямецкі перасовачны кінатэатр Wanderkino наведае Мірскі замак 2 верасня, паведаміла БЕЛТА спецыяліст па сувязях з грамадскасцю ўстановы "Музей" Замкавы комплекс "Мір" Анаіт Арзуманян.
Паводле яе слоў, на тэрыторыі замкавага комплексу адбудзецца кінапаказ праекта ў жывым музычным суправаджэнні скрыпкі і піяніна пад адкрытым небам. Акцёры - два таленавітыя музыканты з Лейпцыга - Тобіяс Ранк і Гюнтард Штэфан. Гледачы змогуць убачыць на экране фільмы самага знакамітага коміка XX стагоддзя Чарлі Чапліна, а таксама амерыканскага акцёра і кінарэжысёра Лойда Гаральда, вядомага сваімі нямымі камедыямі.
Праект Wanderkino ўяўляе сабой мабільны кінатэатр, які спецыялізуецца на паказе нямога кіно самых разнастайных жанраў. Пажарны аўтамабіль Magirus Deutz (1969) служыць тэхнічнай базай для ўсёй кінатэхнікі, забяспечвае святло і гук, транспартуе крэслы і іншую неабходную мэблю і інструментарый.
Wanderkino падарожнічае з 1999 года. За гэты час грузавік не толькі праехаў па ўсёй Германіі, але і пабываў у Францыі, Славеніі, Польшчы, Літве, Чэхіі, Румыніі, Малдове, Швецыі, Даніі, Італіі, Аўстрыі, Славакіі і Швейцарыі. У бягучым годзе ён упершыню наведае Беларусь.-0-
