Сцяг Аўторак, 19 сакавіка 2024
Усе навіны
Усе навіны
Культура
20 лістапада 2017, 12:55

Наваполацкі конкурс "Халі-Хало" вызначае шчырасць і непаўторны каларыт - Ірына Дарафеева

20 лістапада, Віцебск /Вольга Багачова - БЕЛТА/. Наваполацкі конкурс "Халі-Хало" вызначае шчырасць і непаўторны каларыт, адзначыла ў размове з карэспандэнтам БЕЛТА старшыня журы конкурсу, заслужаная артыстка Беларусі Ірына Дарафеева па выніках праведзенага форуму.

Міжнародны конкурс выканаўцаў эстраднай песні "Халі-Хало" прайшоў у Наваполацку 18-19 лістапада. "Ён атрымаўся вельмі яркім, шчырым, са сваім непаўторным каларытам. Упэўнена, конкурс набярэ яшчэ большыя абароты", - сказала Ірына Дарафеева. Вельмі важна, паводле яе слоў, што наваполацкі форум набыў у гэтым годзе міжнародны статус. "Нараўне са значным прадстаўніцтвам нашых дзяцей удзел замежных юных выканаўцаў умацаваў конкурс, павысіў яго планку. І гэта цудоўна, так і павінна быць", - падкрэсліла заслужаная артыстка.

У складзе журы майстэрства ўдзельнікаў ацэньвалі педагогі па вакале, кампазітары і дзеячы мастацтваў з Беларусі, Эстоніі, Малдовы, Украіны. Сваім меркаваннем аб высокім узроўні выканальніцкага майстэрства беларускіх канкурсантаў, іх прафесіяналізме яны падзяліліся з Ірынай Дарафеевай. "Гэта было вельмі прыемна чуць", - адзначыла яна.

Пры выбары пераможцаў членам журы давялося нялёгка. "Вызначыць лепшых ва ўзроставых катэгорыях, асабліва ў сярэдняй групе, было складана, таму што падабраўся даволі моцны склад удзельнікаў. На званне ўладальніка Гран-пры мы выбіралі зорачку, яркі талент, які валодае ўласнай энергетыкай і харызмай. З трох прэтэндэнтаў мае замежныя калегі асабліва вылучылі Мікіту Бялько з Мінска, якому ў выніку і было прысуджана гэта званне", - расказала старшыня судзейскай калегіі. Ірына Дарафеева ўпэўнена, што ў будучым гэты выканаўца несумненна можа стаць сапраўднай зоркай і дабіцца вялікіх поспехаў, калі будзе працаваць над сабой.

За перамогу ў конкурсе спаборнічалі 54 удзельнікі. Першае месца ў малодшай узроставай групе (ад 8 да 10 гадоў) заваяваў Даніэль Вольскі (Мінск), у сярэдняй (ад 11 да 13 гадоў) - Ліліяна Садоўская (Магілёў), у старшай (ад 14 да 16 гадоў) - Алена Алферына (Румынія). Уладальнікам Гран-пры стаў мінчанін Мікіта Бялько.

Конкурс праводзіцца ў мэтах раскрыцця і падтрымкі таленавітых юных выканаўцаў, садзейнічання творчаму развіццю і выканальніцкаму майстэрству дзяцей і моладзі, папулярызацыі дзіцячай музычнай творчасці, выхавання мастацкага густу, адраджэння лепшых традыцый эстраднага жанру, пазіцыянавання дзіцячай вакальнай творчасці як неад'емнай часткі культуры Беларусі, абмену творчымі ідэямі і практычным вопытам.

Арганізатары - Міністэрства культуры, Віцебскі аблвыканкам, Наваполацкі гарвыканкам.-0-

Падпісвайцеся на нас у
Twitter
Топ-навіны
Свежыя навіны Беларусі