30 мая, Мінск /Кар. БЕЛТА/. Навучэнка Смілавіцкага дзіцячага арт-цэнтра "Вулей" Настасся Гурская стала пераможцай конкурсу-пленэра "Санкт-Пецярбург учора, сёння, заўтра", паведамілі БЕЛТА ў Мінскім абласным інстытуце развіцця адукацыі.
Цырымонія ўзнагароджання адбылася ў музеі прыкладнога мастацтва Санкт-Пецярбургскай дзяржаўнай мастацка-прамысловай акадэміі імя А.Л.Шцігліца. Іншыя прадстаўнікі беларускай дэлегацыі - Аліна Воўчак, Сабіна Кукалева, Васіліна Стыдзель, Ганна Лабацэвіч, Сафія Канапацкая, Юлія Хасяневіч, Ганна Паваротная, Настасся Арлова і Яўген Карнеенка - атрымалі сертыфікаты аб праходжання міжнароднай стажыроўкі і дыпломы ўдзельнікаў.
У пленэры таксама прынялі ўдзел 75 дзяцей з Масквы, Сімферопаля, Іжэўска, Валгаграда, Уладзіміра, Ніжняга Ноўгарада, Чалябінска і Карэліі. Канкурсанты малявалі творы на тэмы "Прыгожае ўбранне паўночнай сталіцы" і "Воблакі над Санкт-Пецярбургам". На ажыццяўленне творчай ідэі журы конкурсу адвяло 1 гадзіну і 50 хвілін. Для поўнага раскрыцця сваіх задум ім была прадастаўлена свабода выбару месца для малявання, матэрыялу і тэхнікі.
Юныя мастачкі Міншчыны таксама пазнаёміліся з экспазіцыяй навукова-даследчага музея Расійскай акадэміі мастацтваў, наведалі Эрмітаж і Рускі музей. Шмат новага пра выдатныя мясціны горада на Няве канкурсанты даведаліся дзякуючы адукацыйнаму квесту. Яркія ўражанні ў беларускіх школьнікаў пакінуў Пецяргоф.
Выстава творчых работ удзельнікаў "Вулея" па выніках паездкі ў Санкт-Пецярбург будзе прадстаўлена ў Смілавічах да Дня абароны дзяцей. А ў верасні 27 работ юных талентаў Міншчыны будуць прадстаўлены на выставе ў паўднёва-ўсходнім прыгарадзе Парыжа Шампіньі-сюр-Марн.
Дзіцячы арт-цэнтр "Вулей" працуе з 2016 года на базе Цэнтра творчасці дзяцей і моладзі ў Смілавічах. Створаны па ініцыятыве Белгазпрамбанка пры ўдзеле Нацыянальнага мастацкага музея Беларусі.-0-
